Azərbaycan, Bakı, 5 avqust /Trend, müxbir T.Hacıyev/
Azərbaycanın hakim partiyası NATO PA-da Dağlıq Qarabağla bağlı obyektiv sənədin qəbul olunacağına ümid edir.
"Ümid edirik ki, NATO Parlament Assambleyasında Dağlıq Qarabağ münaqişəsi ilə bağlı obyektiv sənəd qəbul olunacaq", - Trend-in məlumatına görə, bu barədə hakim Yeni Azərbaycan Partiyasının (YAP) icra katibinin müavini, millət vəkili Siyavuş Novruzov YAP-ın rəsmi saytına açıqlamasında bildirib.
Onun sözlərinə görə, Azərbaycan nümayəndə heyəti növbəti sessiya zamanı da Qarabağ məsələsini diqqət mərkəzində saxlayacaq. O, digər beynəlxalq təşkilatlar kimi, NATO-nun da Azərbaycanın ərazi bütövlüyünü dəstəklədiyini deyib.
"Hələ ötən il bu qurumda Dağlıq Qarabağ münaqişəsi ilə bağlı qətnamə layihəsinin müzakirəsi nəzərdə tutulurdu. Amma 2010-cu ildə Azərbaycanda parlament seçkiləri keçirildiyi üçün biz sənədin müzakirəsinin təxirə salınmasını təklif etdik. Ümumiyyətlə, nümayəndə heyəti olaraq hər zaman bu məsələni, Ermənistanın işğalçılıq siyasətini ifşa etmək məqsədilə lazımi addımlar atırıq", - Novruzov deyib.
Noyabr ayında Rumıniyanın paytaxtı Buxarest şəhərində NATO Parlament Assambleyasının payız sessiyası keçiriləcək.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.