Litva, Vilnüs, 6 dekabr /Trend, xüsusi müxbir A.Smirnov/
Azərbaycanın xarici işlər naziri Elmar Məmmədyarov çərşənbə axşamı Vilnüsdə ATƏT-in fəaliyyətdə olan sədri Audronyus Ajubalislə Dağlıq Qarabağ münaqişəsini müzakirə edib.
Trend-in xüsusi müxbirinin məlumatına görə, görüşdə tərəflər Dağlıq Qarabağ münaqişəsinin sülh yolu ilə həllinin vacibliyini vurğulayıblar.
Məmmədyarov Ajubalisə ATƏT-ə sədrliyi dövründə uğurlu fəaliyyət göstərdiyini bildirib və bu münasibətlə onu təbrik edib.
Ajubalis, öz növbəsində, Azərbaycana ATƏT-in işində fəal iştirak etdiyinə və fəal müzakirələrə öz töhfəsini verdiyinə görə minnətdarlığını bildirib.
Sonra görüş bağlı qapılar arxasında davam etdirilib.
Vilnüsdə ATƏT-in Xarici İşlər Nazirləri Şurasının iclası bu gün işinə başlayıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.