Azərbaycan, Bakı, 29 aprel /Trend, müxbir E.Mehdiyev/
Dağlıq Qarabağ münaqişəsinin həll olunmaması Azərbaycan üçün böyük problemlər yaradır. Azərbaycan Qərb dövlətləri ilə demokratiya və insan haqlarının inkişafı, enerji, terrora qarşı mübarizə sahələrində yaxından əməkdaşlıq edir. Trend-in məlumatına görə, bunu çərşənbə axşamı Azərbaycan Prezidenti Administrasiyası (PA) rəhbərinin müavini, PA-nın Xarici əlaqələr şöbəsinin müdiri Novruz Məmmədov Bakıda II Qlobal Açıq Cəmiyyətlər Forumunun panel iclasında çıxışı zamanı deyib.
PA rəsmisinin sözlərinə görə, ölkədə daxili sabitlik tam təmin olunub: "Lakin bir məsələni bacarmırıq. Bu da münaqişəni həll etməkdir. Çünki biz müharibənin sülh yolu ilə həll edilməsinin tərəfdarıyıq. Təəssüflər olsun ki, bu günə qədər nə ATƏT-in Minsk qrupu, nə də dünyanın aparıcı güc mərkəzləri, onlardan da ən mühümü olan Avropa İttifaqından ədalətli mövqe görə bilmirik. Avropa İttifaqı bizə təklif edirdi ki, Assosiasiya Sazişi imzalayaq, orada isə bizim ərazi bütövlüyümüz məsələsi çıxarılmışdır. Avropa İttifaqı 15 il ərzində sənədlərdə bizim ərazi bütövlüyümüzü tanıyıb, lakin son illərdə bunu qəbul etmək istəmir. Bunu biz necə başa düşə bilərik? Belə məsələlər bizi çox düşündürür. Mən fikirləşirəm ki, bu gün bizə ən çox lazım olan ölkə daxilində təsisatların qurulması ilə bərabər beynəlxalq aləmdə ədalətli prinsiplərin sözdə bəyan edilməsi yox, tətbiq olunmasıdır".
N.Məmmədov qeyd edib ki, Ukrayna böhranı ilə bağlı mart ayında dünyanın iki böyük dövlətinin rəhbərləri hərəsi 1 saat çıxış etdi, onlardan biri Barak Obama idi: "Bir saat ərzində beynəlxalq hüquq, onun qorunması, pozulması məsələsini dəfələrlə qeyd etdi. Amma Azərbaycanla bağlı, münaqişə ilə bağlı Qərb və Avropa dövlətinin nümayəndəsi "bu məsələ beynəlxalq hüquq çərçivəsində həll olunmalıdır" ifadəsini işlətmir. Nə üçün belə ikili yanaşma olmalıdır?"
PA rəsmisi əlavə edib: "Biz bir gənc dövlət kimi ilk gündən Avropa istiqamətində seçimimizi müəyyənləşdirdiyimiz üçün düşünürük və bəzən tərəddüd edirik. Axı biz yolumuzu düzmü seçmişik? Nə üçün bizə layiq olduğumuz, hüququmuz olduğu ədalətli dəstək yoxdur? Bu məsələlər bizi çox düşündürür. Düşünürəm ki, heç olmasa, bundan sonra yeganə məsələmiz münaqişənin həllidir. 20 ildir ki, həmsədrlər gəlib-gedir, heç bir şey əldə olunmur. Ona görə ki, Avropa və Qərb tərəfindən konkret mövqe ortaya qoyulmur. Düşünürəm ki, gələcəkdə bu, olacaq".