Azərbaycan, Bakı, 22 yanvar, Trend , müxbir K.Ramazanova/ Azərbaycanın seçki sistemi üzrə Avropa Şurasının Venesiya Komissiyası ilə növbəti müzakirələr fevralın birinci həftəsində Bakıda keçiriləcək. Bu barədə çərşənbə axşamı Komissiyanın nümayəndəsi Sergey Kuznetsov Strasburqdan telefonla məlumat verib.
2008-ci ilə təyin edilən prezident seçkiləri ərəfəsində Azərbaycanın Seçki Kodeksinin təkmilləşdirilməsi üzrə müzakirələr gedir. Görüşdə seçki komissiyalarında dəyişikliklər üzrə təkliflər layihəsi yenidən müzakirə ediləcək.
Onlar üzərində işləri payızadək bitirmək planlaşdırılırdı. Lakin proses seçki komissiyalarının tərkibinin formalaşdırılması üzrə müxalifət partiyalarının mövqeyinə görə uzanıb. Üç müxalifət partiyasını birləşdirən "Azadlıq" bloku iyunda Azərbaycanın Seçki Kodeksinə dəyişikliklər və əlavələr haqqında Venesiya Komissiyasına təkliflər paketi göndərib. Təkliflər paketində seçki komissiyalarının yeni tərkibinin paritet əsasda formalaşdırılması məsələsi öz əksini tapıb.
Noyabrın əvvəlində Bakıda Venesiya Komissiyasının, ATƏT-in və hökumətin və ilk dəfə olaraq, Azərbaycanın siyasi partiyalarının nümayəndələrinin iştirakı ilə dəyirmi masa keçirilib. Görüşün gedişində seçki komissiyalarının tərkibi və seçki prosesi ilə əlaqədar qərarlardan şikayətlə bağlı məsələlər müzakirə edilib.
Azərbaycanın hazırki Seçki Kodeksinə əsasən, şikayətlərə yuxarı seçki komissiyaları və məhkəmlər baxır. Venesiya Komissiyasının nümayəndələri şikayətlərə baxılma müddətinin azaldılmasını təklif edirlər.
Venesiya Komissiyası, ATƏT və Azərbaycan hökumətinin birgə işi çərçivəsində, Kodeksə seçkilərin gedişində barmaqların nişanlanması üzrə maddənin daxil edilməsi haqqında qərar artıq qəbul edilib. Həmçinin, tərəflər seçkilər zamanı zərflərdən istifadə edilməməsi haqqında razılığa gəliblər.
Venesiya Komissiyasının Seçki Kodeksi üzrə Azərbaycan hakimiyyəti ilə danışıqlarını yazda bitirmək planlaşdırılır.
