Azərbaycan, Bakı, 30 yanvar/ Trend , müxbir K.Ramazanova/ Avropa Şurasının Nazirlər Komitəsinin Aqo Qrupu aprelin ilk həftəsində qrupun sədri, İsveçin Avropa Şurasındakı daimi nümayəndəsi Pyer Syergenin başçılığı ilə Cənubi Qafqaz regionuna səfər edəcək. Bu barədə Aqo Qrupunun mətubat katibi Kristof Poirel məlumat verib.
Səfər çərçivəsində Azərbaycanın Avropa Şurası qarşısında götürdüyü öhdəliklərin yerinə yetirilməsi və əməkdaşlıq məsələləri təfsilatlı müzakirə ediləcək.
Poirelin sözlərinə görə, prezident seçkiləri, KİV və Azərbaycanın məhkəmə sistemi ilə bağlı məsələlər də diqqət mərkəzində olacaq.
Aqo Qrupu səfər çərçivəsində hökumət, vətəndaş cəmiyyəti və parlament nümayəndələri ilə görüşlər keçirəcək.
Aqo Qrupunun nümayəndələri Azərbaycana səfərlərindən sonra Ermənistana yola düşəcəklər.
