Azərbaycan, Bakı, 01 fevral / Trend , müxbir Q.Cəbiyev/ Hakim Yeni Azərbaycan Partiyası (YAP) seçkiqabağı Azərbaycanda ictimai-siyasi vəziyyətə dair bölgələrdə əhali arasında sorğular keçirib. Bu barədə cümə günü Trend ə YAP-ın icra katibinin müavini Mübariz Qurbanlı məlumat verib.
Azərbaycanda prezident seçkiləri oktyabrda keçiriləcək. YAP indiki dövlət başçısı İlham Əliyevin namizədliyini irəli sürəcək. Müxalifətin bir qismi seçkilərdə iştirak barədə qərar versə də, Xalq Cəbhəsi, Vətəndaş , İnkişaf və Liberal partiyalarının birləşdiyi "Azadlıq" bloku seçkiləri boykot etmək niyyətini açıqlayıb.
Qurbanlı deyib ki, sorğuların nəticələrinə görə, seçkiqabağı müxalifətin proqnozlaşdırdığı kimi, ziddiyyətlər olmayacaq. Onun sözlərinə görə, prezident seçkisində müəyyən siyasi gərginliklər olsa da, ciddi qarşıdurma olmayacaq. "Bizim namizədin qələbəsi heç kimdə şübhə doğrumasa da, seçkilərə ciddi şəkildə hazırlaşırıq. Müxalifətin mövcudluğunu inkar etmirik. Bununla belə, biz hesab edirik ki, yenə də müxalifətin proqnozları özünü doğrultmayacaq"-- Qurbanlı əlavə edib.
YAP 1992-ci ildə, o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 14 ildir hakim partiya olan YAP-ın indiki sədri prezident İlham Əliyevdir.