Azərbaycan, Bakı, 26 fevral / Trend , müxbir C.Babayeva/ "İrəli" Ümumrespublika Gənclər Hərəkatının fəalları çərşənbə axşamı dünyanın 10 mindən çox konqressmen və senatorlarının, həmçinin beynəlxalq təşkilatların elektron ünvanına Xocalı faciəsinin reallıqları barədə məlumatı əks etdirən məktub göndəriblər. Bu barədə çərşənbə axşamı Trend a Hərəkatın mətbuat xidmətindən məlumat verilib.
Fevralın 26-sı Azərbaycanda Xocalı faciəsinin 16-cı ildönümü qeyd olunur.
1992-ci il fevralın 25-dən 26-na keçən gecə Ermənistan Silahlı Qüvvələrinin bölmələri Xocalını hər tərəfdən mühasirəyə almaqla şəhəri fasiləsiz olaraq müxtəlif növ odlu silahlardan atəşə tutublar.
Xocalı faciəsi zamanı həlak olan 613 nəfərin 106-sı qadın, 63-ü uşaq, 70-i yaşlı insan olub. Səkkiz ailə tamamilə məhv edilib, 25 uşaq hər iki valideynini, 130-u isə valideynlərindən birini itirib, 487 nəfər yaralanıb, 150 isə itgin düşüb.
Hərəkatın məlumatına görə, həmçinin "YouTube" saytında Xocalı faciəsi barədə videoçarxın yerləşdirilməsi planlaşdırılır.
İki ildən artıqdır ki, fəaliyyət göstərən "İrəli" Ümumrespublika Gənclər Hərəkatının beş min nəfər üzvü var.
