Azərbaycan, Bakı, 27 fevral / Trend , müxbir S.İlhamqızı/ Ümid Partiyası Müsavat Partiyasının Məclis sədri Sülhəddin Əkbəri "Ümid" haqqında yalnış fikir formalaşdırmaqda günahlandırır. Bu barədə partiyadan Trend ə daxil olan bəyanatda bildirilir.
Müsavat Məclisinin sədri Əkbər mətbuata verdiyi müsahibəsində bildirib ki, digər müxalifət partiyalarından fərqli olaraq, Ümid Partiyasının təzyiqlərlə üzləşməməsinin, qərargahından çıxarılmamasının səbəblərinə jurnalist tədqiqatı apararaq daha dəqiq cavab tapmaq olar.
Ümid Partiyasının bəyanatında bildirilir ki, Əkbər 2003-cü ilin prezident seçkisindən sonra baş verən hadisələrə görə Ümid Partiyasının sədri İqbal Ağazadənin həbs olunmasını, işgəncələrə və digər psixoloji təyziqlərə məruz qalmasını unudur.
"Qərargahdan çıxarılmamağa gəldikdə isə Ümid Partiyası dövlətin onun üçün ayırdığı binada deyil, şəxsi mülkdə yerləşib. Sülhəddin Əkbər İqbal Ağazadə və Ümid Partiyası haqqında jurnalist tədqiqatının aparılmasına ehtiyac olduğunu qeyd edir. Amma biz təklif edirik ki, 2003-cü il hadisələrində Sülhəddin Əkbərin niyə digər həbs yoldaşlarından bir il öncə həbsdən azad olunması barədə düşünüb, jurnalist tədqiqatı aparılsın"-deyə Ümid Partiyasından bildirilib.
Ümid Partiyası hesab edir ki, Müsavat funksionerinin sözügedən açıqlaması müxalifətin ümumi işinə ziyan vurur və hakimiyyətin "dəyirmanına su tökür".
Məsələ ilə əlaqədar Əkbər Trend ə açıqlamasında bildirib ki, Ümid Partiyasının onun fikirlərindən narahat olması özü şübhələr yaradır: "Hər bir siyasətçinin, partiyanın fəaliyyəti araşdırıla bilər və bu, təbii qarşılanmalıdır. Ümid Partiyasının şübhəyə düşməsi özü şübhələr yaradır"-deyə Əkbər bildirib.
Onun fikrincə, 2003-cü ildə həbsdən hamıdan əvvəl çıxmasına eyham vurulması da yersiz ittihamdır. Əlavə edib ki, bu məsələ də araşdırıla bilər və bunun əleyhinə deyil.
"Belə yersiz konflitklər müxalifətin ümumi işinə əngəl törədir"-deyə Əkbər Ümid Partiyasına cavab olaraq bildirib.