Azərbaycan, Bakı, 04 mart / Trend , müxbir K.Zərbalıyeva/ Sərhədçilər ötən ay 21 kiloqramdan artıq narkotikanın Azərbaycana keçirilməsinin qarşısını alıblar.
Dövlər Sərhəd Xidmətinin çərşənbə axşamı yaydığı məlumatda bu barədə məlumat verilir.
Bildirilir ki, sərhədçilər fevral ayında axtarışda olan 63 nəfəri saxlayaraq hüquq-mühafizə orqanlarına təhvil veriblər.
Xəzər dənizində sahilboyu rejim qaydalarını pozan Azərbaycana məxsus 3 gəmi və 3 qayıq saxlanılıb. Sərhəd rejim qaydalarına riayət etməyərək dənizə sənədsiz çıxdığı üçün mühərriksiz taxta qayıqda olan 2 nəfər və "Veterok" mühərrikli taxta qayıqda olan 3 nəfər Azərbaycan vətəndaşı saxlanılaraq barələrində müvafiq tədbirlər görülüb.
Ötən ay 43 halda ümumi dəyəri 181 min 903 manat olan qaçaqmal saxlanılıb.
Bu dövrdə dövlət sərhədini keçmiş və ya keçməyə cəhd göstərərkən 20 halda 32 nəfər sərhəd pozucusu saxlanılıb.
Onlardan 10-u Azərbaycan, 9-u İran, 5-i Rusiya, 3-ü Gürcüstan, 3-ü İraq, 1-i Türkiyə və Cənubi Koreya vətəndaşları olub.
Sərhəd zastavalarının xidməti ərazisindən 47 nəfər sərhəd rejim qaydalarını pozduğu üçün, 13-ü müvafiq sənədləri olmadığı üçün, 54-ü vizası olmadığı üçün, 23-ü vizasının müddəti qutardığı üçün saxlanılıb.
