Azərbaycan, Bakı, 11 mart/ Trend , müxbir K.Ramazanova/ Beynəlxalq Böhran Qrupu Azərbaycan və Ermənistanı qoşunların təmas xəttində toqquşmaların aradan qaldırılması üçün bütün lazımi tədbiləri görməyə çağırır.
"Biz 1994-cü ildən bəri ən uzunmüddətli atəşkəs rejiminin pozulması faktlarından çox narahatıq", - çərşənbə axşamı Beynəlxalq Böhran Qrupunun Qafqaz layihəsinin direktoru Maqdalena Friçova (Magdalena Frichova) elektron poçtu ilə Trend -a bildirib.
Martın 4-dən Azərbaycan və Ermənistan qoşunlarının təmas xəttində (Azərbaycanın işğal edilmiş əraziləri istiqamətində) atəşkəs rejimi pozulur. Ölən və yaralananlar var.
Friçova qeyd edib ki, Böhran Qrupu iki ölkə silahlı qüvvələrinin təmas xəttində qurbanlar və insan itkiləri, o cümlədən Azərbaycanın iki dinc sakininin həlak olmasından təəssüflənir.
"Biz ümid edirik ki, hər iki tərəf bu hadisənin təkrarlanmasına yol verməyəcək", - o bildirib.
Cənubi Qafqazın iki ölkəsi arasında münaqişə 1988-ci ildə Ermənistanın Azərbaycan ərazi iddiası ilə başlayıb. 1992-ci ildən etibarən, Azərbaycanın 20% ərazisi, o cümlədən Dağlıq Qarabağ və ona bitişik 7 rayon Ermənistan Silahlı Qüvvələri tərəfindən işğal edilib. 1994-cü ilin mayında tərəflər atəşkəs haqqında razılığa gəlib və bu vaxta qədər ATƏT-in Minsk Qrupunun himayəsi altında Rusiya, Fransa və ABŞ-ın həmsdərliyi ilə, hələ ki nəticəsiz, sülh danışıqları aparılır.
