Azərbaycan, Bakı, 13 mart / Trend , müxbir S.İlhamqızı/ Azərbaycan Ziyalılar Birliyi builki prezident seçkisində nə iqtidarın, nə də müxalifətin namizədinə dəstək verəcək.
"Ziyalılar xalqı təmsil edəcək namizədi dəstəkləyəcəklər"-deyə Azərbaycan Ziyalılar Birliyinin (AZB) sədri Eldəniz Quliyev Trend ə açıqlamasında bildirib.
Bu ilin oktyabrında Azərbaycanda keçiriləcək prezident seçkisində indiki prezident İlham Əliyevin, müxalifətdən Müsavat Partiyasının başqanı İsa Qəmbərin, ADP sədri Sərdar Cəlaloğlunun, Ümid Partiyasının sədri İqbal Ağazadənin, Böyük Quruluş Partiyasının sədri Fazil Qəzənfəroğlunun, ACP lideri Rəsul Quliyevin namizəd olacağı açıqlanıb.
Quliyev bildirib ki, AZB üzvləri seçkidə hər iki siyasi düşərgənin təmsilçilərinə səs verməyəcək. Onun fikrincə, təkcə AZB deyil, xalqın böyük əksəriyyəti nə iqtidara, nə də müxalifətə inanır: "Biz heç bir siyasi düşərgəni və partiyanı təmsil etməyən, xalqın namizədi olacaq şəxsə dəstək verəcəyik. Siyasi partiyaların hakimiyyətə gələcəyi təqdirdə hansı işlər, islahatlar aparacaqlarına dair real proqramları yoxdur, onların fəaliyyəti yalnız qəzetlərinin gördüyü işlərdən ibarətdir"-deyə Quliyev bildirib.
O, əlavə edib ki, AZB xalqın namizədi kimi müstəqil politoloq, Azərbaycan Naminə İctimai Forumun rəhbəri Eldar Namazovu görür və namizədliyini irəli sürərsə, onu dəstəkləyəcək.
Quliyevin verdiyi məlumata görə, AZB-nin 26 min nəfər üzvü var, qurumun Ali Şurasında 21 nəfər müstəqil mövqeli ziyalı, alim təmsil olunur.
