Azərbaycan, Bakı, 14 mart / Trend , müxbir S.İlhamqızı/ Vəhdət Partiyası hesab edir ki, müxalifət partiyalarının bir qisminin prezident seçkisini boykot etməsi, qalanlarının seçkidə iştirakı müxalifətə zərbə vurur.
"Müxalifət partiyalarının belə pərakəndə vəziyyətə düşməsi, parçalanması müxalifətə Vəhdət Partiyasınldan daha çox ziyan vurur və zəiflədir"-deyə Vəhdət Partiyasının sədri Tahir Kərimli Trend a açıqlamasında bildirib.
Bu ilin oktyabrında Azərbaycanda keçiriləcək prezident seçkisində müxalifətçi Müsavat, ADP, Ümid, Böyük Quruluş və başqa partiyalar öz namizədi ilə iştirak edəcəyini açıqlayıb. AXCP, ALP və VİP-i birləşdirən müxalifət "Azadlıq" bloku isə, demokratik mühit yaradılmayacağı təqdirdə, seçkini boykot edəcəyini bildirib.
Vəhdət Partiyasının sədri bildirib ki, tam demokratik mühit yaradılsa belə, müxalifətin seçkidə qalib gəlmək şansı yoxdur: "Xalq artıq onu dəfələrlə aldadan müxalifətə inanmır. Ona görə də müxalifət partiyalarının hər dəfə seçkidəki məğlubiyyətini seçki saxtakarlığı ilə əsaslandırması bəhanədir"-deyə Kərimli bildirib.
Onun fikrincə, müxalifət adı altında fəaliyyət göstərən partiyalar prezident seçkisinə münasibətdə fərqli mövqelər göstərməklə, elektoratı parçalayır, nəticədə bu, iqtidarın xeyrinə yönəlir. Həmçinin, partiyaların daxilindəki zidiyyətlər üzündən onların parçalanması da müxalifəti zəiflədir: "Vəhdət Partiyası açıq və səmimi şəkildə bəyan edir ki, prezident seçkisində İlham Əliyevi dəstəkləyəcək. Lakin müxalifətçi adını daşıyan bir çox partiyalar bu ad altında gizlənərək, iqtidara daha çox xeyir verirlər"-deyə Kərimli bildirib və nəzərdə tutduğu partiyaların adını açıqlamaqdan imtina edib.
Azərbaycanın Ali Məhkəməsinin keçmiş sədri, sabiq millət vəkili Tahir Kərimlinin rəhbərlik etdiyi Vəhdət Partiyası 2006-cı ilədək müxalifət mövqeyində olub. Partiya hazırda iqtidarın siyasi kursunu dəstəkləyir.