Azərbaycan, Bakı, 17 mart / Trend ", müxbir Q.Cəbiyev/ Azərbaycan Demokrat Partiyası (ADP) bəyan edib ki, müxalifətin prezident seçkisi ilə bağlı bir araya gəlmək imkanı tükənib. "Müxalifət qüvvələri arasında seçkiyə yanaşmada ciddi fərqlər yarandığından, birlik üçün zəmin qalmayıb" bazar ertəsi Trend "a müxalif ADP sədri Sərdar Cəlaloğlu bildirib.
Azərbaycanda seçkilər oktyabrda keçiriləcək. Seçkiyə 7 ay vaxt qalmasına baxmayaraq, müxalifətin vahid namizədlə iştirak cəhdləri nəticəsiz qalıb.
Cəlaloğlu müxalifətin seçki məsələsində müxalifətin bir yerdə olmayacağını deyib. "Toxumu asfaltın üstünə səpib ondan məhsul gözləsək, məhsul biçə bilməyəcəyik. Toxumu münbit torpağa əkmək lazımdır ki, məhsul əldə edəsən" ADP sədri əlavə edib.
Cəlaloğlu prezident seçkisində iştirakla bağlı iddiasını ortaya qoyan ADP və Müsavat Partiyasının da birliyini real saymır: "Namizədliyimi irəli sürməmişdən qabaq, nəbz yoxlaması apardım. Seçkilərlə bağlı müxalifət sədrləri ilə görüşdüm və nəticə əldə olunmadı. Bütün bunlardan sonra mən niyə kiminləsə bir araya gəlməyə cəhd göstərməliyəm?".
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını (ACP) yaradıblar.