Azərbaycan, Bak, 29 mart / Trend , müxbir C.Babayeva/Demokratik Seçki Mərkəzi (DSM) Azərbaycan və Ermənistanın hərbi qoşunlarının təmas xəttində atəşkəsin elan olunması ilə bağlı sazişin imzalandığı gün Bakının mərkəzi hissəsində mitinq keçirməyi planlaşdırır. Bu barədə şənbə günü Trend a DSM-də təmsil olunan Azadlıq partiyasının sədri Əhməd Oruc məlumat verib.
Cənubi Qafqazın iki dövləti arasında münaqişə 1988-ci ildə Ermənistanın Azərbaycana ərazi iddiası səbəbindən yaranıb. Azərbaycan ərazisinin 20%-i - Dağlıq Qarabağ və ona bitişik yeddi rayon Ermənistan Silahlı Qüvvələri tərəfindən işğal olunub. 1994-ci il mayın 12-də tərflər atəşkəs elan edib və bu günə qədər ATƏT-in Minsk qrupu - Rusiya, Fransa və ABŞ-ın vasitəçiliyi ilə hələ də nəticəsiz sülh danışıqları aparılır.
Yanvarın 30-da doqquz müxalifət partiyası - Klassik Xalq Cəbhəsi Partiyası, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbaycan, Açıq Cəmiyyət, Təkamül və Yaşıllar partiyası Demokratik Seçki Mərkəzinin yaradılması barədə qərar qəbul edib.
Orucun sözlərinə görə, mitinq Azərbaycan ordusunda radikal islahatların həyata keçirilməsi və rəsmi Bakının Dağlıq Qarabağ münaqişəsinin sülh yolu ilə həllinə dair üzərinə götürdüyü öhdəlikdən imtina etmək çağırışı ilə keçiriləcək.
"Mitinqə dəstək vermək üçün Mərkəz Azərbaycanın bütün siyasi təşkilatlarına müraciət edəcək" - deyə Oruc qeyd edib.
Onun sözlərinə görə, Bakı Şəhər İcra Hakimiyyəti tərəfindən mitinqin keçirilməsinə şəhərin kənarında yer ayrılsa, Mərkəz mitinqin keçirilməsindən imtina edəcək.
Orucun qeyd etdiyi kimi, mitinq kütləvi olmayacaq, belə ki, cəmiyyət hələ də kütləvi aksiyalara passiv yanaşır. O, mitinq iştirakçılarının gözlənilən sayını bildirməyib.
