Azərbaycan, Bakı, 10 aprel / Trend , müxbir Q.Cəbiyev/ Müxalif Azərbaycan Demokrat Partiyası (ADP) bildirib ki, hakimiyyətin namizədi ən demokratik seçkidə belə, müxalifətin namizədinə qalib gəlmək imkanındadır. "Normal mübarizədə uduzmaq insana şərəfsizlik gətirməz və etiraf etməliyəm ki, hətta normal seçkilər keçirilsə, ADP-nin namizədi Sərdar Cəlaloğlu hakimiyyətin namizədi İlham Əliyevə cüzi fərqlə də olsa, uduzacaq" ADP Ali Şurasının üzvü Qurban Məmmədov cümə axşamı Trend a bildirib.
ADP Ali Şurası fevralın 16-da Cəlaloğlunun prezidentliyə namizədliyini irəli sürüb. Hakim Yeni Azərbaycan Partiyası (YAP) isə partiyanın sədri, indiki prezident İham Əliyevin namizədliyini irəli sürəcəklərini açıqlayıb.
Məmmədov deyib ki, hazırda ölkədə demokratik seçki mühiti yoxdur. Buna baxmayaraq, ADP seçkidə iştirak edəcək: "Biz seçkidə iştirak qərarını verməklə hakimiyyətin müxalifətin şərti kimi olan normal seçki mühiti yaradacağına ümid edirik" Məmmədov əlavə edib.
ADP funksioneri müxalifətin seçkiyə hazırlığının qaneedici olmadığını deyib və bunun səbəbini ölkədə normal seçki mühitinin olmaması ilə izah edib. Məmmədov hesab edir ki, müxalifətin seçkidə uğur qazanmasının yeganə yolu vahid komandanın yaradılmasıdır.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını (ACP) yaradıblar.
Məqalə müəllifi ilə əlaqə ünvanı: [email protected]