Böyük Britaniya, London, 11 aprel / " müxbir G.Əhmədova/ Cənubi Qafqazda mədəni irsin öyrənilməsi üzrə Avropa Şurası Parlament Assambleyasının (AŞPA) nümayəndə heyətinin rəhbəri Edvard O`xara ümid edir ki, region ölkələrinin bir-birinə qarşı ziddiyyətli mövqe tutması səbəbindən iki ildir ki, təxirə salınan səfəri həyata keçəcək. "Mən hələ də ümid edirəm ki, regiona səfərim reallaşacaq" - deyə O`xara Trend a bildirib.
O`xaranın 2006-cı ilin yayından Cənubi Qafqaza planlaşdırılan səfəri bir neçə dəfə təxirə salınıb. Rəsmi Bakının mövqeyinə əsasən, Azərbaycanın 20 faiz torpaqlarını - Dağlıq Qarabağ və ona bitişik yeddi rayonu işğal edən və AŞPA məruzəçisinin regiona səfərini istəməyən Ermənistanın mövqeyi buna mane olur. Ermənistan tərəfi iddia edir ki, Bakı O`xaranın, güya ermənilərin tarixi abidələrinin məhv edildiyi Naxçıvan Muxtar Respublikasına (Azərbaycan) səfər etməsinə icazə vermir
O`xara bildirib ki, səfər marşrutu üzrə razılaşma mütləq regiona planlaşdırılan səfərin bir hissəsi olacaq. O'xara AŞPA-nın yaz sessiyası çərçivəsində Azərbaycan və Ermənistan nümayəndələri ilə görüşü nəzərdə tutaraq gələn həftə Strasburqda hər iki münaqişə tərəfi ilə bu məsələ üzrə irəliləyiş əldə ediləcəyinə ümid etdiyini bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. 30 mindən çox insanın ölümünə səbəb olan hərbi əməliyyatlardan sonra tərəflər 1994-cü ildə atəşkəs rejimi əldə ediblər və o vaxtdan bəri ATƏT-in Minsk qrupunun himayəsi altında hələ ki nəticəsiz sülh danışıqları aparılır.
Rəsmi Bakının bəyanatına görə, ermənilər Ermənitsanda və Azərbaycanın işğal olunmuş ərazilərində Azərbaycanın mədəni və tarixi abidələrini məhv ediblər. Azərbaycan tərəfi tələb edir ki, O`xara Ermənistana və işğal olunmuş ərazilərə səfər edərək buna şəxsən əmin olusun.
O`xaranın regiona səfərini AŞPA-nın Elm, Təhsil və Mədəniyyət üzrə Komitəsi hazırlayacaq.
Müəlliflə əlaqə saxlamaq üçün elektron ünvan : [email protected]
