Azərbaycan, Bakıı, 11 aprel / Trend , müxbir S.Ağayeva/ Bakıda Azərbaycan və Latviya arasında əməkdaşlığın siyasi aspektləri müzakirə olunacaq. Səfirlikdən cümə günü verilən məlumata görə, danışıqlar Latviya dövlət katibinin müavini Edqar Skujanın aprelin 14-16-da Bakıya gözlənilən səfəri çərçivəsində aparılacaq.
Latviya dövlət katibinin müavini Bakıda ikitərəfli əməkdaşlığın perspektivləri, Azərbaycanın Aİ və NATO-ya inteqrasiyası üzrə Latviyanın yardımı ilə bağlı məsələləri müzakirə edəcək.
Skuja həmçinin aprelin 15-16-da Azərbaycan paytaxtında keçiriləcək GUAM - Gürcüstan, Ukrayna, Azərbaycan və Moldova ərazilərində "dondurulmuş münaqişələr"ə dair beynəlxalq konfransda iştirak edəcək.
Konfransda Sovet İttifaqının dağılmasından sonra GUAM ölkələri ərazisində yaranan Dnestryanı, Gürcüstan-Abxaziya, Gürcüstan-Osetiya və Ermənistan-Azərbaycan, Dağlıq Qarabağ münaqişələrinin nizamlanması üzrə prinsipial əsasların müzakirə olunacağı gözlənilir.
