Azərbaycan, Bakı, 16 aprel / Trend , müxbir C.Babayeva/ Müxalifəti təmsil edən Azərbaycan Milli Demokrat Partiyası (AMDP) və Azadlıq Partiyasının birləşməsi ilə bağlı ilkin razılıq əldə olunub. Azadlıq Partiyasının sədri Əhməd Orucun çərşənbə günü Trend a bildirdiyinə görə, AMDP-nin keçmiş sədri İsgəndər Həmidov partiyaların birləşməsinin tərəfdarıdır.
Keçən həftə müxalifəti təmsil edən Azərbaycan Milli Demokrat Partiyasının sədri, sabiq daxili işlər naziri Həmidov partiya sədrliyindən istefa verib siyasətdən getdiyini bəyan edib. Həmidov istefasının səbəbini gənclərə yol açması ilə izah edib.
AMDP və Azadlıq Partiyası Demokratiya Uğrunda İttifaq (DUİ) və Demokratik Seçki Mərkəzində təmsil olunur.
Orucun sözlərinə görə, partiyaların birləşməsində ciddi problemlər olmayacaq.
"Partiyaların birləşməsindən sonra kimin sədrlik edəcəyi deyil, partiyanın hansı prinsiplər əsasında fəaliyyət göstərəcəyi əhəmiyyət kəsb edəcək", deyə Oruc bildirib.
Partiyaların birləşməsi baş tutandan sonra həmin partiyanın prezident seçkisi ilə bağlı mövqeyinə gəlincə, Oruc qeyd edib ki, birləşmiş partiya DUİ-nin prezidentliyə vahid namizədini dəstəkləyəcək.
AMDP-nin qurultaya hazırlıq üzrə Təşkilat Komitəsinin sədri Oqtay Xəlilli çərşənbə günü Trend a açıqlamasında bildirib ki, Komitənin şənbə günü keçirilmiş iclasında partiyanın Azadlıq Partiyası ilə birləşməsinə etiraz edənlər olub.
"Partiyaların birləşməsilə bağlı yekun qərar AMDP Böyük Məclisinin mayın 15-nə qədər keçiriləcək iclasında qəbul olunacaq", deyə Xəlilli bildirib.
Xəlillinin qeyd etdiyi kimi, AMDP-nin Həmidovun sədrliyi dövründə qoşulduğu sazişlər qüvvədədir.
"Partiyanın prezident seçkisi ilə bağlı qərarı Qurultayda qəbul olunacaq. Qurultayın keçirilməsi gecikərsə, qərar Böyük Məclisin iclasında qəbul oluna bilər", deyə Xəlilli bildirib.
Məqalə müəllifi ilə əlaqə ünvanı: [email protected]