Azərbaycan, Bakı, 28 aprel/ Trend , müxbir C.Babayeva/ Vaxtilə Azərbaycan Milli Demokrat Partiyasından (AMDP) uzaqlaşan üzvlər İsgəndər Həmidovun istefasından sonra partiyanı yaşatmaq məqsədilə yenidən partiya sıralarına qayıdırlar. Bu barədə bazar ertəsi Trend -a Təşkilat Komitəsinin sədri Oqtay Xəlilli məlumat verib.
Azərbaycan müxalifətini təmsil edən Milli Demokrat Partiyasının sədri, Azərbaycanın sabiq daxili işlər naziri İsgəndər Həmidov siyasətdən getdiyini bəyan edib. Partiya qurultaya hazırlaşır və bunun üçün Təşkilat Komitəsi yaradılıb. Hazırda AMDP-yə rəhbərliyi sədrin müavini Xəlillinin başçılıq etdiyi qurultaya hazırlıq üzrə Təşkilat Komitəsi həyata keçirir.
Xəlillinin sözlərinə görə, partiyaya qayıtmış keçmiş üzvlər AMDP-nin qurultaya hazırlıq üzrə Təşkilat Komitəsinə üzv qəbul olunub və hazırda Komitənin 21 üzvü var.
Qurultayın keçirilmə vaxtının müəyyənləşəcəyi Böyük Məclisin iclası mayın 11-də keçiriləcək. İclasda AMDP-nin prezident seçkilərində iştirak forması, Əhməd Orucun AMDP-nin Azadlıq Partiyası ilə birləşmək təklifi və partiyanın keçmiş sədrinin istefası müzakirə olunacaq. İclasda Həmidovun da iştirakı gözlənilir.
Xəlillinin sözlərinə görə, bu günə qədər Həmidovla Böyük Məclisdə iştirak məsələsi müzakirə olunmasa da, Təşkilat Komitəsi onun iclasın işinə qatılacağına inanır.
Onun sözlərinə görə, AMDP-yə sədr kənar partiylardan deyil, AMDP-nin üç üzvü arasından seçiləcək. Xəlillinin öncə bildirdiyinə görə, sədrliyə namizədliyini irəli sürmək niyyətində olanlar Siyasi Şuranın keçmiş üzvü Eldar Tağıyev və Nəzarət Təftiş Komissiyasının üzvü Şaban Nəsirovdur.
