Azərbaycan, Bakı, 08 may/ Trend , müxbir İ.Əlizadə/ Azərbaycan müxalifətini təmsil edən Açıq Cəmiyyət Partiyası (ACP) yerləşdiyi qərargahı sahibinə qaytarmaqdan imtina edir. "Fəaliyyət göstərdiyimiz mülkün sahibi qərargahı boşaltmaqla bağlı Səbail rayon məhkəməsinə müraciət etmişdi. Məhkəmə ACP-nin qərargahdan çıxması haqqında qərar qəbul edib. Biz həmin qərardan Bakı Apellyasiya Məhkəməsinə şikayət vermişik. Apellyasiya Məhkəməsi qərar çıxarmayana qədər qərargahı tərk etməyəcəyik", -deyə cümə axşamı Trend -a açıqlamasında ACP sədrinin müavini Nizami Məmmədov bildirib.
ACP hazırda İçəri Şəhərdə, Kiçik Qala küçəsi 128 ünvanında yerləşən qərargahda fəaliyyət göstərir. Qərargah ACP lideri, parlamentin keçmiş sədri Rəsul Quliyevin bacısının həyat yoldaşı İdris Quliyevə məxsusdur. Eks-spikerlə yeznəsi arasında qalmaqal yaranıb. Ona görə də İdris Quliyev ACP-nin ona məxsus olan mülkdən çıxmasını tələb edir. ACP rəhbərliyi ilə mülk sahibinin imzaladığı bir illik müqavilənin müdəti mayın 8-də başa çatır.
"Əgər İdris Quliyev məhkəməyə müracit etməsəydi, müqavilənin müddəti başa çatan
kimi qərargahı tərk edərdik. Məhkəmə prosesi başa çatmayana qədər bizi qərargahdan heç
kim çıxara bilməz. İdris Quliyevin polisə də müraciət etmək hüquqi yoxdur. Çünki işə
məhkəmə baxır", -deyə ACP rəsmisi əlavə edib.
O qeyd edib k, əgər Apellyasiya Məhkəməsi ACP-nin qərargahdan çıxması haqqında qərar qəbul etsə, ona əməl edəcəklər.
Məmmədovun sözlərinə görə, çərşənbə günü yeni müqavilə imzalamaq üçün İdris Quliyevə müraciət ediblər. Lakin o, ACP ilə yeni müqavilə imzalmaqdan imtina edib.
ACP hazırda başqa ünvanda qərargah axtarır.
Qərargahın sahibi İdris Quliyev bildirib ki, nəyin hesabına olursa-olsun ACP bu gün qərargahı tərk etməlidir: "Mən bir qədər sonra açarları götürmək üçün ora gedəcəm. Əgər ACP müqavimət göstərsə, lazımı sturukturlara müraciət edəcəm. Rəsul Quliyev demokratiyadan danışır. Lakin qanunlara əməl etmək istəmir".
Sağ mərkəzçi, müxalifətyönlü ACP bu ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. Azərbaycanın hüquq-mühafizə orqanları Quliyev haqqında cinayət işi açıblar və eks-spiker İnterpol vasitəsi ilə beynəlxalq axtarışa verilib. O, dövlət əmlakını mənimsəməkdə, vəzifəsindən sui-istifadədə, vəzifə səlahiyyətlərini aşmaqda ittiham olunur. Quliyev bu ittihamları rədd edir. 2007-ci ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]