Azərbaycan, Bakı, 21 may / Trend , müxbir E.Babayev/ İsveçin hakim Moderat Partiyası təmsilçilərinin bu gün Azərbaycana səfəri başlayıb. Səfər müxalif Azərbaycan Milli İstiqlal Partiyasının (AMİP) dəvəti ilə həyata keçirilir. Bu barədə çərşənbə günü Trend -a AMİP-in sədr müavini Əli Orucov məlumat verib.
Azərbaycana gələn nümayəndə heyətinin tərkibinə İsveç Baş nazirinin İcra Aparatının rəhbəri Kristoffor Tomsons, Moderat Partiyasının parlament fraksiyasının siyasi məsləhətçisi Peter Linder daxildir.
Orucov bildirib ki, səfərdə məqsəd Moderat Partiyasının təcrübəsi ilə bağlı seminarlar keçirməkdir. Seminarlarda seçki təşviqatının aparılması, kampaniyanın təşkili ilə bağlı məruzələr olunacaq. "Seminarlardan biri bu gün Xaçmaz rayonunda, digəri isə mayın 23-də Goranboy rayonunda keçiriləcək" - deyə o bildirib.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
