Azərbaycan, Bakı, 21 may / Trend , müxbir E.Babayev/ Azərbaycan müxalifəti Avropa Şurasını Azərbaycanla bağlı həyata keçirdiyi siyasətə yenidən baxmağa çağırıb. "Avropa Şurası Azərbaycanla əlaqədar siyasətini dəyişməlidir. Çünki Avropa Şurasına üzv olduqdan sonra ölkədə demokratiyanın inkişafı sahəsində daha çox geriləmələr baş verib" - çərşənbə günü Trend a müxalif Azərbaycan Demokrat Partiyasının (ADP) sədri Sərdar Cəlaloğlu deyib.
Azərbaycan 2001-ci ildən Avropa Şurasının üzvüdür. Avropa Şurası Azərbaycanın üzərinə götürdüyü öhdəliklərlə bağlı intensiv monitrinqlər aparır və ölkədə həyata keçirilən islahatlar qurumun ölkə üzrə həmməruzəçilərinin hazırladığı hesabatlarda əksini tapır. Növbəti hesabat AŞ PA-nın gələn ay keçiriləcək sessiyasında müzakirə olunacaq.
Avropa Şurası Azərbaycanda, əsasən, insan haqlarının qorunması, qanunvericiliyin təkmilləşdirilməsi sahəsində monitorinqlər aparır.
Cəlaloğlu bildirib ki, Seçki Məcəlləsinə nəzərdə tutulan əlavə və dəyişikliklər müxalifətin Avropa Şurası ilə bağlı mövqeyinin doğru olduğunu bir daha ortaya qoyur. "Seçki Məcəlləsi ilə bağlı Avropa Şurası Venesiya Komissiyası hakimiyyətlə danışıqlar aparıb. Nəticədə, ortalığa hamımıza məlum olan əlavə və dəyişikliklər çıxıb ki, bu, əvvəlkilərdən də pisdir. Bizim fikrimizcə, bu təcrübəyə son qoymaq lazımdır. Avropa Şurası siyasi dialoqda ciddi bir nailiyyət əldə edə bilməyəcəyini başa düşür. Ona görə də danışıqlarda müxalifətin iştirakını təmin etmir"- deyə Cəlaloğlu qeyd edib.
Üç müxalifət partiyasını (Xalq Cəbhəsi, Vətəndaş və İnkişaf, Liberal) özündə birləşdirən "Azadlıq" bloku da hesab edir ki, faktlar Avropa Şurasına üzvlükdən sonra Azərbaycanın demokratiya sahəsində gerilədiyini göstərir. Blokun üzvü, Vətəndaş və İnkişaf Partiyasının (VİP) sədri Əli Əliyev çərşənbə günü Trend a deyib ki, istər qanunvericilik, istər mətbuat, istərsə də sərbəst toplaşmaq məsələsində Azərbaycanın gerilədiyi faktdır. "Avropa Şurasından çıxmaq Azərbaycana fayda verməz" - deyən Əliyev hesab edir ki, cəmiyyətin narazılığını toplum halında çatdırmaq və beynəlxalq qurumların ölkə ilə bağlı siyasətlərində dəyişiklik etməyə nail olmaq lazımdır.
Müxalif Böyük Quruluş Partiyasının (BQP) sədri, millət vəkili Fazil Qəzənfəroğlu çərşənbə günü Trend a bildirib ki, müxalifət AŞ PA-nın Monitorinq Komitəsinin həmməruzəçiləri Andres Herkel və Yevgeniya Jivkova kimi aşağı səviyyəli Avropa məmurlarının yönəltdikləri istiqamətdən kənara çıxmalıdır. "Herkel son bəyanatında bildirir ki, Azərbaycanda həbsdə olan jurnalistlər azadlığa buraxılmalıdır və bu olmasa, hesabatımız çox sərt olacaq. Bu, ilk növbədə, onu göstərir ki, prinsipiallıq çox aşağıdır. Hesabat sərt olacaqsa, bunun jurnalistə nə dəxli? Jurnalistin buraxılması bazarlıqdırsa, bu, niyə hesabata aid edilir?" - deyən millət vəkili əlavə edib ki, müxalifət heç də Azərbaycanın Avropa Şurasından çıxmasını istəmir. "Bu qurumla Azərbaycanın əməkdaşlığının böyük faydası var. Sadəcə, bu əməkdaşlıqdan umduğumuz var. Mənim fikrimcə, Avropa Şurasının ayrı-ayrı təmsilçilərinin vədlərinə aludə olaraq, sadəlövhcəsinə məğlubiyyətə getməkdənsə, Avropa Şurasından nələrin Azərbaycanın faydasına olacağını düşünmək daha məqsədəuyğun olardı" - Qəzənfəroğlu əlavə edib.
Azərbaycanın AŞ PA-dakı nümayəndə heyətinin üzvü, hakim Yeni Azərbaycan Partiyasının (YAP) Siyasi Şurasının üzvü Aydın Mirzəzadə isə, çərşənbə günü Trend a bildirib ki, müxalifətin iddiaları əsassızdır. "Əgər onların dediyi kimi, Azərbaycan geriləyibsə, deməli, müxalifət də geriləyib. Ola biməz ki, cəmiyyət geriləsin, ancaq müxalifət irəliyə getsin"- deyən Mirzəzadə vurğulayıb ki, Azərbaycan Avropa Şurasına üzv qəbul olunduqdan sonra demokratiya sahəsində irəliyə doğru mühüm addımlar atıb. Qanunvericilik bazası Avropa standartlarına uyğunlaşdırılıb, Azərbaycanda demokratik islahatlar gücləndirilib. Onun sözlərinə görə, müxalifətin narazılığının arxasında başqa məqam durur. Müxalifət demokratiyanın elə modelini istəyir ki, həmin model avtomatik olaraq onları hakimiyyətə gətirsin. Dünyanın heç bir yerində müxalifət hakimiyyətin gördüyü işlərin üstündən xətt çəkmir" - deyə o qeyd edib.
Məqalə müəllifi ilə əlaqə ünvanı: [email protected]
