Azərbaycan, Bakı, 02 iyun/ Trend , müxbir E.Babayev/ Müxalif Azərbaycan Demokrat Partiyasında (ADP) prezident seçkilərində iştirakla bağlı fikir ayrılığı yaranıb. "Seçki Məcəlləsinə əlavə və dəyişikliklər indiki şəkildə qəbul olunduqdan sonra, seçkilərdə iştirak etmək xalqa xəyanət olacaq. Əgər ADP bu halda seçkidə iştirak etsə, mən ərizəmi yazaraq partiyadan istefa verəcəyəm", -deyə bazar ertəsi Trend -a ADP Ali Şurasının üzvü Qurban Məmmədov bildirib.
Trend - un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkini boykot edəcəyi barədə bəyanat verib.
Məmmədov bəyan edib ki, Seçki Məcəlləsində müxalifətin təklifləri nəzərə alınmamaqla yanaşı, bura müxalifətin imkanlarını daha da məhdudlaşdıran maddələr salınıb. "Dəyişikliklər sırasında namizədlər üçün depozitin 300 min manata qaldırılması, dövlət KİV-də namizədlərə ayrılan pulsuz təbliğatın ləğv olunması, namizədlərin qeydiyyatının ləğvinin sadələşdirilməsi kimi məsələlər yer alıb. Bütün bunlardan sonra seçkiyə getmək xalqa xəyanətdir", - deyə Məmmədov vurğulayıb.
ADP sədri Sərdar Cəlaloğlu isə bildirib ki, partiya seçkidə iştirak qərarına yenidən baxmayacaq. "Biz seçkidə iştirakla bağlı qərar verəndə deməmişik ki, müsbət dəyişikliklər olacağı halda seçkiyə gedəcəyik", - deyən Cəlaloğlu Məmmədovun fikirlərini şərh etmək istəməyib. Onun fikrincə, hər bir fərdin proseslərə fərqli yanaşması ola bilər və buna qadağa qoyulmayıb.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
Məqalə müəllifi ilə əlaqə ünvanı: [email protected]