Azərbaycan, Bakı, 04 iyun / Trend , müxbir D.Xatınoğlu, R.Hafizoğlu/ Sünni və şiə məzhəblərinin tərəfdarları olan müsəlmanlar arasında böyük münaqişələrlə nəticələnən fikir ayrılıqlarının aradan qaldırılması üçün onlar arasında dialoq yaradılmalıdır. "Məzhəblərarası dialoq üzrə konfranslar bütün müsəlman ölkələrində keçirilməlidir", - deyə rusiyalı dinşünas alim Heydər Camal Trend -a bildirib.
İyunun 3-4-də Səudiyyə Ərəbistanında "İslam məzhəbləri arasında dialoq" konfransı keçirilib. BBC-nin məlumatına əsasən, bu konfrans sünni və şiə müsəlmanları arasında münaqişələrin həlli məsələsini qarşıya məqsəd qoyub. Ciddə şəhərində keçirilən konfransda 500-ə yaxın dinşünas alim iştirak edib.
"Məzhəblərarası dialoq yalnız Səudiyyə Ərəbistanında deyil, eyni zamanda İranda da keçirilməlidir. Bu gün islam dünyası üçün məzəhəblərarası dialoqdan daha önəmli məsələ yoxdur", - deyə Rusiya İslam Komitəsinin sədri Camal çərşənbə axşamı telefonla Moskvadan bildirib. Onun fikrincə, müsəlmanlar ilk növbədə məzhəblərarası ixtilafları aradan qaldırmalıdırlar.
"İslam dünyası xarici düşmənlərə qarşı mübarizə aparmaq üçün məzhəblər arasındakı fərqli düşüncə və baxışları bir kənara qoyaraq, vəhdət təşkil etməli, bu prinsip altında birləşməlidir. Əks halda, islam uduzmaq təhlükəsi ilə üz-üzədir", - deyə Camal hesab edir.
Ekspert əlavə edib ki, məzhəblərarası dialoqa həsr olunmuş konfranslar digər müsəlman ölkələrində də keçirilməlidir: "Bu kimi toplantıların əsəs müsbət cəhətlərindən biri məzhəblərin bir-birini daha yaxından tanıması və digərləri haqqında formalaşmış yanlış fikirləri dəyişdirməsindən ibarətdir", - deyə Camal bildirib.
Digər islamşünas alim Zahid Gül isə hesab edir ki, məzhəblərarası diaoloq adı altında keçirilən konfrans müsbət nəticələnməyəcək.
"Təəssüf hissi ilə qeyd edirəm ki, bu kimi konfransların nəticəsi həmişə kağız üzərində də qalır", - deyə Zahid çərşənbə axşamı Əmmandan telefonla Trend -a bildirib.
Ekspertin fikrincə, tərəflər özləri də konfransın faydasız və nəticəsiz olacağına əmindirlər. "Bu gün islam məzhəbləri arasında olan xırda ixtilaflar siyasiləşib və bu məsələlərin "məzhəblərarası dialoq" konfransında həlli qeyri-mümkündür", - deyə ekspert bildirib.
Zahid hesab edir ki, toplantıda hər hansı bir razılıq əldə olunsa da, konfrans iştirakçıları bunu həyata keçirməyəcəklər. "Bu kimi konfranslar keçirməkdənsə, müsəlmanların dini cəhətdən maarifləndirilməsi daha faydalı olardı", - deyə o, əlavə edib.
Ötən ay ərzində bəzi müsəlman ölkələrində, xüsusilə də Livan və İraqda sünni və şiə qrupları arasında qanlı münaqişələr yaranıb. Mayın sonunda Livanda baş verən qruplararası qarşıdurmalar Qətərin müdaxiləsi və vasitəçiliyi ilə bir qədər səngiyib. Lakin İraqdakı gərgin vəziyyət hələ də davam etməkdədir.
Məqalə müəllifi ilə [email protected] ünvanı ilə əlaqə saxlaya bilərsiniz.
