Azərbaycan, Bakı, 07 iyun/ Trend , müxbir E.Babayev/ Müxalif Azərbaycan Demokrat Partiyası (ADP) bəyan edib ki, indiki şəraitdə müxalifətin birləşməsi bu düşərgəyə məxsus elektoratın itirilməsi ilə nəticələnə bilər. "Siyasətdə birləşmələr bəzən istənilən nəticəni vermir, yəni bu artıq sadə riyazi cəmləşmə yox, ortaq keyfiyyətdə olan qüvvələrin birləşməsidir. Təcrübə göstərir ki, bəzən belə birləşmələrdə 10 faizə qədər itki olur", - deyə şənbə günü Trend -a ADP sədri Sərdar Cəlaloğlu bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Cəlaloğlu bildirib ki, prezidentliyə mövcud namizədlərin birləşməsi gözlənilən deyil. "Birləşmənin özü də uzun vaxt tələb edir. Bu baxımdan, seçkiyə 4-5 ay qalmış bir ərəfədə birləşmə ideyasını ortalığa atıb, bunun üstündə baş sındırmağın mənası yoxdur. Eyni zamanda, mən hesab etmirəm ki, müxalifətin vəzifəsi birləşməkdir və bu düşərgənin şansı birləşməklə bağlıdır. Ona görə də mən birləşməni seçkidəki müvəffəqiyyətimizlə qətiyyən bağlamaq istəmirəm", - deyə o əlavə edib.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
Məqalə müəllifi ilə əlaqə ünvanı: [email protected]
