Azərbaycan, Bakı,0 9 iyun / "Tr müxbir E.Babayev/ Azərbaycanın müxalif Müsavat Partiyası qarşıdan gələn prezident seçkilərində iştirak qərarını dəyişməyib. "Partiya Divanının bu gün keçirilən iclasında seçkidə iştirak məsələsi yenidən geniş müzakirə olundu və məsələ ilə bağlı partiyanın strukturlarında müzakirələrin davam etdirilməsi məqsədəuyğun sayılıb",- deyə bazar ertəsi Trend -a Müsavat Divanının iclasından partiyanın Mərkəzi İcra Aparatının rəhbəri Arif Hacılı məlumat verib.
Trend -un arayışı: İyunun 2-də Milli Məclisin qərarı ilə Seçki Məcəlləsində bir sıra dəyişikliklər edilib. Təbliğat kampaniyasının müddəti 120 gündən 75 günə endirilib. 75 günün 28-i təşviqat işlərinə, qalan günlər isə namizədin müəyyən edilməsi, onun qeydə alınması üçün imzaların toplanması, imzaların Mərkəzi Seçki Komissiyası tərəfindən yoxlanması və digər prosedur tədbirlərinə sərf olunacaq. Namizədin dəstəklənməsi üçün lazım olan imzaların sayı, əvvəllər olduğu kimi, 45 min yox, 40 min müəyyən edilib, dövlət KİV-də seçki təbliğatı qadağan olunub. Müxalifət dəyişikliklərdən narazı qalıb və seçkilərdə iştirak məsələsinə yenidən baxılması ilə bağlı Müsavatda müzakirələr başlayıb.
Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Hacılı deyib ki, Müsavat Məclisinin seçkidə iştirak qərarı qüvvədədir. Sadəcə olaraq, məsələnin ciddiliyini nəzərə alaraq, yerli strukturlarda müzakirələr davam ediriləcək.
Hacılı onu da bildirib ki, iclasda Müsavatın təşkilatçılığı ilə Bakıda keçirilməsi nəzərdə tutulan beynəlxalq forum da müzakirə edilib. "Bilirsiniz ki, bu il Azərbaycan Demokratik Respublikasının yaranmasının 90 ili tamam olub. Bu münasibətlə biz bu ili Cümhuriyyət İli elan etmişik. Bu məqsədlə iyunun 22-24-də beynəlxalq forum keçirmək niyyətindəyik" - deyə Hacılı əlavə edib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş deputatla parlamentdə təmsil olunur.
Məqalə müəllifi ilə əlaqə ünvanı: [email protected]
