Azərbaycan, Bakı, 12 iyun/ Trend , müxbir E.Babayev/ Azərbaycanda mərkəzi icra hakimiyyəti orqanlarının mətbuat xidmətlərinin Vahid Əsasnaməsi üzərində tamamlama işləri aparılır. "Dövlət qurumlarının mətbuat xidmətlərinin işini yüksəltmək və "İnformasıya azadlığı haqqında" qanunun tələblərınə uyğunlaşdırmaq üçün vahid standartlara cavab verən əsasnamə hazırlanır", cümə axşamı Trend -a eksklüziv açıqlamasında Prezidentin İcra Aparatının İcrimai-siyasi şöbəsinin müdiri Əli Həsənov bildirib.
Trend -un arayışı: Hökumət idarələrinin mətbuat xidmətlərinin işinin səmərəliliyini artırmaq üçün mətbuat xidməti orqanlarının Vahid Əsasnaməsi hazırlanır və sənədin məcburi icra edilməsi üçün həmin qurumlara göstərişlər veriləcək. Azərbaycanın dövlət orqanlarının mətbuat xidmətlərinin işinin təkmilləşdirilməsi, onların peşəkarlıq səviyyəsinin yüksəldilməsi məqsədi ilə beynəlxalq təşkilatlar, o cümlədən Avropa Şurası ilə birgə bir neçə seminar təşkil olunub.
Həsənov deyib ki, dövlət orqanlarının mətbuat xidmətlərinin fəaliyyəti ötən illərlə müqayisədə xeyli təkmilləşib: "Bütün mərkəzi hakimiyyət orqanlarında mətbuat xidmətləri yaradılıb və dövlət qurumlarının saytları formalaşdırılıb. Lakin bu iş bəzilərində zəif, bəzilərində isə güclü şəkildə müşahidə olunur".
Məqalə müəllifi ilə əlaqə ünvanı: [email protected]
