Azərbaycan, Bakı, 24 iyun / Trend , müxbir E.Babayev/ Azərbaycanın müxalif "Azadlıq" bloku prezident seçkisini boykot etmək barədə qərarını dəyişdirməyəcəyini müəyyənləşdirib. "Seçki Məcəlləsinə əlavə və dəyişikliklərin təsdiq edilməsinin bizim üçün heç bir mənası yoxdur. Onsuz da biz seçkiləri boykot edəcəyimiz barədə bəyanat vermişik", çərşənbə axşamı Trend -a "Azadlıq" blokunun həmtəsisçisi, AXÇP sədri Əli Kərimli bildirib.
Trend -un arayışı: İyunun 2-də Milli Məclisin qərarı ilə Seçki Məcəlləsində bir sıra dəyişikliklər edilib. Seçki kampaniyasının müddəti 120 gündən 75 günə endirilib. 75 günün 28-i təşviqat işlərinə, qalan günlər isə namizədin müəyyən edilməsi, onun qeydə alınması üçün imzaların toplanması, imzaların Mərkəzi Seçki Komissiyası tərəfindən yoxlanması və digər prosedur tədbirlərinə sərf olunacaq. Bundan başqa, namizədin dəstəklənməsi üçün lazım olan imzaların sayı əvvəllər olduğu kimi 45 min yox, 40 min müəyyən edilib, dövlət KİV-də seçki təbliğatı qadağan olunub.
Azərbaycan prezidenti iyunun 23-də Seçki Məcəlləsinə əlavə və dəyişiklikləri təsdiq edib.
Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları isə seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Kərimli vurğulayıb ki, blokun Sədrlər Şurasının boykotla bağlı bəyanatı yaxın bir neçə həftə ərzində Məclisdə müzakirə edilib yekun qərar veriləcək.
Blokun digər həmtəsisçisi, Milli Birlik Hərəkatınnın lideri Lalə Şövkət Hacıyeva isə çərşənbə axşamı jurnalistlərə bildirib ki, Seçki Məcəlləsinə əlavə və dəyişikliklərin təsdiqlənməsi blokun boykot mövqeyini dəyişməyəcəyini qətiləşdirib. Hacıyevanın sözlərinə görə, bununla belə blok AŞPA-nın iyun sessiyasının nəticələrini gözləyəcək. "Sessiyada Azərbaycanla bağlı müzakirələr olacaq. Bu müzakirələrin nəticələrinə baxacağıq. Mənim ciddi gözləntilərim yoxdur, amma nəsə ola bilər. Ona görə də bir qədər gözləmək lazımdır. AŞPA-nın yay sessiyası başa çatdıqdan sonra ABŞ dövlət katibinin müavini Azərbaycana gələcək. Onunla görüşlərimiz olacaq. O məhz seçki ilə bağlı Azərbaycana gəlir. Biz bundan sonra boykotla bağlı qəti qərarımızı verəcəyik", - deyə Hacıyeva bildirib.
Məqalə müəllifi ilə əlaqə ünvanı: [email protected]