Gürcüstan, Batumi, 01 iyul / Trend , müxbir N. Kirtsxaliya/ "Demokratiya və iqtisadi inkişaf naminə təşkilat - GUAM"ın çərşənbə axşamı Batumidə keçirilən üçüncü sammiti çərçivəsində, GUAM-ABŞ formatında görüş keçirilib. Bu barədə Trend a Gürcüstan XİN - dən məlumat verilib. Görüşün yekununda birgə bəyanat qəbul olunub.
Tərəflər siyasi əməkdaşlıq məsələləri, gələcək münasibətlərin perspektivləri, ticarət, nəqliyyat, sərhədlərin təhlükəsizliyi, vergi, terrorçuluq və mütəşəkkil cinayətkarlığa qarşı mübarizə sahələrində yeni layihələri nəzərdən keçiriblər.
Görüşdə Gürcüstanın xarici işlər nazirinin müavini Nino Kalandadze, onun azərbaycanlı həmkarı, GUAM-ın Milli koordinatoru Araz Əzimov, Moldovanın xarici işlər və Avropa inteqrasiyası nazirinin müavini, GUAM-ın Milli koordinatoru Valieru Ostalep, Ukraynanın xarici işlər nazirinin müavini, GUAM-ın Milli koordinatoru Aleksandr Xorin, ABŞ Dövlət Katibinin kömkçisi Devid Merkel və GUAM-ın Baş katibi Valeri Çeçelaşvili iştirak ediblər.
GUAM-ABŞ formatında növbəti görüş Nyu-Yorkda, BMT-nin 63-cü Baş Assambleyası zamanı keçiriləcək.
