...

Azərbaycanın müxalifət partiyasının üzvləri adlarının seçici siyahısına düşmədiyini iddia edirlər

Siyasət Materials 7 İyul 2008 13:39 (UTC +04:00)

Azərbaycan, Bakı, 07 iyul/ Trend , müxbir E.Babayev/ Müxalif Azərbaycan Milli İstiqlal Partiyasının (AMİP) bir qrup üzvlərinin adları seçici siyahılarına düşməyib. "Bizim araşdırmamız nəticəsində məlum olub ki, 35 partiya üzvünün adı seçisi siyahısında yoxdur", bazar ertəsi Trend -a AMİP sədrinin müavini Əli Orucov deyib.

Trend -un arayışı: Azərbaycanda prezident seçkisi oktyabrın 15-də keçiriləcək.

MSK may ayının sonu keçirilən iclasında yeni tərtib olunan seçici siyahılarını təsdiqləyib. Təsdiq olunan siyahıya əsasən, siyahıda 4 milyon 834 min 584 seçici qeydə alınıb. Siyahıya düşən seçicilərin 52 faizi qadın, 48 faizi isə kişidir. Ötən il tərtib olunan seçici siyahısında 4 mln.600 mindən çox seçici qeydə alınmışdı.

Orucov bildirib ki, milli istiqlalçıların adlarının seçici siyahısına düşməməsi ilə bağlı MSK-nın nəzdində olan "Seçkilər" İnformasiya Mərkəzində yaradılan "qaynar xətt"ə müraciət edib.

"Seçkilər" İnformasiya Mərkəzinin rəhbəri Ramil Hüseynov isə bazar ertəsi Trend -a bildirib ki, seçici siyahılarının dəqiqləşdirilməsi proses davam edir. Seçki Məcəlləsinə əsasən, seçkiyə 25 gün qalmışa qədər dəqiqləşmələr davam edəcək və siyahı bir daha elan olunacaq. "Azərbaycanda 5 milyona yaxın seçici var. Ola bilər ki, kiminsə adı siyahıya düşməyib. Siyahılar tərtib olunarkən onun hansı partiyaya mənsub olması araşdırılmır və bu məsələyə siyasi don geyindirmək lazım deyil. Bunun üçün sadəcə "qaynar xətt"ə müraciət etmək lazımdır", deyən Hüseynov təsdiq edib ki, Orucov adlı vətəndaş həqiqətən "qaynar xətt"ə müraciət edib. Araşdırma nəticəsində məlum olub ki, onun adı siyahıda var. "Əgər başqa partiya üzvləri öz adlarını tapa bilmirlərsə, bizə müraciət etsinlər",- deyə o əlavə edib.

AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti