Azərbaycan, Bakı, 07 iyul/ Trend , müxbir E.Babayev/ Azərbaycanın müxalif Müsavat Partiyası iyulun 11- də Bakı Şəhər İcra Hakimiyyətinin qarşısında piket keçirəcək. "Aksiyada sərbəst toplaşmaq azadlığının məhdudlaşdırılmasına etiraz ediləcək" - deyə bazar ertəsi Trend -a Müsavatın Mərkəzi İcra Aparatının rəhbəri Arif Hacılı partiya Divaının iclasından sonra bildirib.
Trend -un arayışı: Müsavat Bakı Şəhər İcra Hakimiyyətini iyunun əvvəllərində məhkəməyə verib. İyunun 25 - də Səbail rayon məhkəməsi Müsavatın iddiası ilə bağlı qərarı çıxararaq, partiyanın iddiasını rədd edib. Partiya yaxın vaxtlarda bu qərardan appelyasiya şikayəti verib. Müsavatın iddiasında Bakı meriyasının, partiyanın mayın 4 - də keçirmək istədiyi mitinqə müvafiq yer ayrılmaması ilə bağlı qərarı qanunsuz sayılaraq, ləğvi tələb olunurdu. Müsavat mayın 4 -nə və 18 -nə planlaşdırdığı iki mitinqi təxirə salıb. Buna Bakı meriyasının aksiyaçıları Bibiheybət qəsəbəsindəki stadiona göndərmək istəməsi səbəb olub. Partiya mitinqə Ukrayna meydanı, keçmiş "Qələbə" kino- teatrının qarşısı, "Nərimanov" metro stansiyasının ətrafı, Füzuli meydanı və ya Təbriz" (keçmiş "Sevinc") kino - teatrının qarşısındakı ərazilərdən birinin ayrılmasını istəyirdi. Ötən ay partiya Bakı Şəhər İcra Hakimiyyətinin qarşısında piket keçirmişdi.
Hacılı bildirib ki, Müsavat həm məhkəmə, həm də piketlərlə ölkədə sərbəst toplaşmaqla problemlərin həllinə nail olmaq istəyir.
Müxalifəti təmsil edən Müsavat Partiyası 1992 - ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003 - cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]