Azərbaycan, Bakı, 14 iyul/ Trend , müxbir A.Bədəlova/ Azərbaycanda yerli bazarda yüksək keyfiyyətli İsrail mallarının iştirakı üzrə xidmətlər göstərən şirkət yaradılacaq. Bu barədə Trend -a AZERİSRA Azərbaycan-İsrail ticarət evinin prezidenti Aleks Şapiro-Suliman məlumat verib.
Həm də İsrail Azərbaycanlıları Konqresinin prezidenti olan Şapiro-Sulimanın sözlərinə görə, bu gün AZERİSRA ticarət evinin yaradılmasına zərurət Azərbaycan bazarında normal keyfiyyətli İsrail mallarının olmaması ilə bağlıdır.
"Biz azərbaycanlı alıcılara İsrailin dövlət istehsalı olan yüksək keyfiyyətli məhsullar təklif edəcəyik", - Şapiro-Suliman bildirib.
Alıcılara təklif olunan əsas məhsullar tibbi avadanlıq, dərmanlar, "Kennedy" firmasının elektrik malları, qida məhsulları, İsrailin məşhur "minus 417" və "Dead sea cosmetics" firmasının istehsalı olan Ölü dənizin kosmetikası, SANO firmasının yuyucu vasitələri olacaq.
AZERİSRA tibbi və hüquqi xidmətlərin göstərilməsi üzrə fəaliyyət həyata keçirəcək. "Biz konsaltinq firması açmaq niyyətindəyik. Bu firmada beynəlxalq biznesi analiz edəcək və Azərbaycana onun inkişafında yardım edəcəyik", - Şapiro-Suliman söyləyib.
AZERİSRA müasir tibbi avadanlıqla təchiz olunmuş və yüksək ixtisaslı mütəxəssislərdən ibarət şəxsi klinikaya malik olacaq. Şirkət həmçinin öz alıcılarına Azərbaycan banklarının birində qeydiyyatdan keçmiş xüsusi kredit kartlarından, həmçinin online-shop-dan istifadə imkanı verməyi planlaşdırır.
AZERİSRA-nın prezidentinin sözlərinə görə, Azərbaycanda belə mağazaların ümumi sayı 10 olacaq. Onlardan beşi Bakıda, beşi regionlarda, xüsusilə də Oğuz, Şamaxı, Şəki, Gəncə və Sumqayıtda yerləşəcək.
AZERİSRA-nın Bakı ofisinin rəsmi açılışı avqusta planlaşdırılır.
Azərbaycan və İsrail arasında münasibətlərin inkişafından danışan Şapiro-Suliman daha çox perspektivli sahələr kimi tikinti və turizm sektorlarını göstərib.
O, iki ölkə arasında hazırki münasibətləri yüksək qiymətləndirib və əməkdaşlığın bundan sonra da inkişaf etdirilməsi niyyətinin olduğunu qeyd edib.
"Bu gün Azərbaycan və İsrail arasında münasibətlər ən yaxşı, ən strateji münasibətlərdir. Azərbaycan bizim ikinci strateji tərəfdaşımızdır. Biz daima bir-birimizi yaxın hesab etmişik və biz yaxşı münasibətlərimizi inkişaf etdirməyə davam edəcəyik", - Şapiro-Suliman bildirib.
Şapiro-Sulimanın sözlərinə görə, heç bir ölkə digər ölkə ilə əməkdaşlıq və iqtisadi əlaqələrlə tam qane və bütün sahələrdə əlaqələrin mövcud olduğunu, onların genişləndirilməsinə zərurətin olmadığını bəyan edə bilməz.
"İqtisadi münasibətlərin səviyyəsindən asılı olmayaraq onların daim genişləndirilməsi və dərinləşdirilməsinə zərurət var. Bu sahədə İsrail və Azərbaycanın imkanları isə kifayət qədər böyükdür", - Şapiro-Suliman söyləyib.
Müəlliflə əlaqə saxlamaq üçün elektron ünvan: [email protected]
