Azərbaycan, Bakı, 22 iyul/ Trend , müxbir E.Babayev/ Azərbaycanın müxalif millət vəkili hesab edir ki, bu il keçiriləcək prezident seçkisində hakimiyyətin qələbə qazanmaq imkanları daha artıqdır. "Reallıq hissini itirməyən hər bir adama məlumdur ki, indiki şəraitdə öz namizədliyini irəli sürən müxalifətçilərin topladığı səs qalib gəlmək üçün yetərli olmayacaq", çərşənbə axşamı Trend -a müxalifətdən olan millət vəkili Əli Məsimli bildirib.
Trend -un arayışı: Azərbaycanda növbəti prezident seçkisinin oktyabrın 15-də keçirilməsi nəzərdə tutulur. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtidaryönlü Ana Vətən və Sosial Rifah partiyaları seçkidə İlham Əliyevin namizədliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə qərar verib.
Məsimli bildirib ki, müxalifətin mövcud şəraiti dəyişdirmək üçün konkret fəaliyyət proqramı olmalıdır. Həmçinin müxalifət özü dəyişməlidir, proseslərə adaptasiya olunmalıdır. "Müxalifət Azərbaycanın formalaşmış reallıqları çərçivəsində pillə-pillə hərəkət etməlidir. Eyni zamanda, daxili çəkişmələrə nöqtə qoymalıdır. Müxalifət dövrün tələblərinə uyğun ideyalarla çıxış edə bilmir", - deyə Məsimli bildirib.
Məsimli 1991-ci ildən Azərbaycan Prezidenti Aparatının İqtisadiyyatın idarə edilməsinin təşkili şöbəsinin bölmə midiri, Sosial-iqtisadi inkişaf şöbəsinin baş məsləhətçisi, 1992-ci ildən Azərbaycan Xarici İnvestisiyalar Komitəsinin sədri, Azərbaycan Respublikası Baş nazirinin birinci müavini, Dövlət İqtisadiyyat və Planlaşdırma Komitəsinin sədri, Baş nazir əvəzi, iqtisadiyyat naziri, 1993-2005-ci illərdə "Mistəqil İqtisadçılar Birliyi" ictimai təşkilatının prezidenti vəzifələrində çalışıb. Uzun müddət Xalq Cəbhəsi partiyasında rəhbər strukturlarda çalışan Məsimli 2003-ildən sonraAzad Demokratlar Birliyi Partiyasının yaradılması niyyəti ilə Təşkilat Komitəsi yaradıb. 2005-ci il noyabrın 6-da 113 saylı Şəki şəhər seçki dairəsindən deputat seçilib.
Məqalə müəllifi ilə əlaqə ünvanı: [email protected]