Azərbaycan, Bakı, 04 avqust / Trend , müxbir C.Babayeva/ Azərbaycanın müxalifətçi Yeni Zaman Partiyası (YZP) builki prezident seçkisində iştirak etməmək barədə qərar qəbul edib. "Partiya dövlət qeydiyyatına alınmamasını və ölkədəki seçkiqabağı vəziyyəti nəzərə alaraq prezident seçkisində iştirakdan imtina edib", deyə bazar ertəsi Trend -a YZP-nin sədri Musa Ağayev məlumat verib.
Trend -un arayışı: Azərbaycanda prezident seçkisi oktyabrın 15-də keçiriləcək.
İndiyə qədər Azərbaycan prezidenti vəzifəsinə Yeni Azərbaycan Partiyasının sədri İlham Əliyevin, Müasir Müsavat Partiyasının sədri Hafiz Hacıyevin, Ümid Partiyasının sədri İqbal Ağazadənin, Azərbaycanın Liberal-Demokrat Partiyasının sədri Fuad Əliyevin və Yaşıllar Partiyasının sədri Mais Güləliyevin namizədliyi irəli sürülüb. Müsavat, Azərbaycan Demokrat Partiyası və Klassik Xalq Cəbhəsi Partiyası prezident seçkisində iştirak etməmək barədə qərar qəbul ediblər.
Ağayevin bildirdiyinə görə, YZP heç bir formada seçkiyə qatılmayacaq. "Partiya prezidentliyə hazırki namizədlər arasında dəstəyə layiq şəxs görmür", deyə o bildirib.
Müxalifətçi Yeni Zaman Partiyası 2007-ci il iyulun 15-də təsis olunub.
Məqalə müəllifi ilə əlaqə ünvanı: [email protected]