"Armİnfo"nun verdiyi xəbərə görə, Azərbaycan tərəfi bazar ertəsi dörd əsir ermənini Ermənistana qaytarıb.
Əsirlərin qaytarılması prosesi bazar ertəsi saat 12:20-də Azərbaycan-Ermənistan sərhədinin Naxçıvan istiqamətində baş tutub. Əsirlərin qaytarılması tərəflərin apardığı danışıqlardan sonra baş tutub.
Aprelin 18-dən 19-na keçən gecə dörd Ermənistan vətəndaşı - Vanik Zmboyan (Qavar), Artyom Zoqrabyan (Noraduz), Karen Torosyan (Noraduz) və Ağası Enokyan (Noraduz) Azərbaycan tərəfinə keçiblər.
Azərbaycan Müdafiə Nazirliyinin mətbuat xidmətindən Trend -a bildiriblər ki, hazırda mətbuat üçün müvafiq məlumat hazırlanır. Müdafiə Nazirliyi hələ ki, məsələ ilə bağlı heç bir detalı açıqlamayıb.
Beynəlxalq Qırmızı Xaç Komitəsinin (BQXK) Bakı ofisindən Trend -a verilən məlumata görə, BQXK əsir ermənilərin qarşı tərəfə verilməsi prosesində iştirak etməyib. Belə ki, tərəflər vasitəçilik barədə xahişlə onlara müraciət etməyiblər və əməliyyatı özləri reallaşdırıblar.