Azərbaycan, Bakı, 13 avqust / Trend , müxbir E.Babayev/ Azərbaycanın müxalif Müsavat Partiyasının üzvü, "Yeni Müsavat" qəzetinin baş redaktoru hesab edir ki, seçkidə iştirakdan imtina edən partiyaların birgə sammiti keçirilməlidir.
"Müsavat hələ bir neçə ay bundan əvvəl də belə bir sammitin keçirilməsi təklifini vermişdi, amma bu təklif o zaman reallaşmadı. İndi proseslər müxalifətin sammitinin təcili olaraq keçirilməsini zəruri edir", çərşənbə günü Trend -a Rauf Arifoğlu bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Böyük Quruluş, Azadlıq partiyaları, o cümlədən "Azərbaycan Naminə" İctimai Forumun rəhbəri Eldar Namazov seçkidə iştirakdan imtina ediblər. Bundan sonra müxalifətin koalisiyasının yaranması məsələsi gündəmə gəlib.
Arifoğlunun sözlərinə görə, çox təəssüf ki, müxalifətin birliyi məsələsi söz-söhbət səviyyəsindədir. "Seçkidə iştirak etməmək qərarından sonra partiyaların faktiki olaraq yaxınlaşması müşahidə olunmur. Nə aşkar, nə də gizli şəkildə müxalifət liderləri arasında heç bir toplantı keçirilməyib. Bu, çox ciddi nüansdır və narahatedici bir hadisədir. Müxalifətdaxili sammitin və məsləhətləşmələrin başlanması Müsavat Partiyası Məclisinin avqustdakı qərarından dərhal sonra keçirilməli idi. Təəssüf ki, bunlar baş vermir və bu, düşünməyə əsas verir ki, partiyalar arasında buzlar hələ də əriməyib və münasibətlərin əməkdaşlıq formatına keçməsi üçün addımların atılması baş vermir", - Arifoğlu əlavə edib.
Arifoğlu deyib ki, müxalifətin birliyi prezident seçkilərinin gedişatına heç bir təsir göstərməyəcək. "Bu vəziyyətdə inanmıram ki, müxalifətin birliyi seçkilərin nəticələrinə hansısa təsir göstərə bilər və müxalifətin seçkilərə təsir baxımından hansı addım atıb-atmamasının faktiki əhəmiyyəti qalmayıb. Ancaq Azərbaycanda siyasət seçkilərdən sonra da davam edəcək. Seçki sonrası proseslər üçün və seçkilər dövründə müxalifət partiyalarının dağılmaması üçün bir araya gəlmək çox vacibdir", - deyə o əlavə edib.
Seçkilərdə iştirakdan imtina edən partiyalardan Xalq Cəbhəsi və Müsavat istisna olmaqla, digər müxalifət partiyaları koalisiyanın yaranması ideyasına müsbət yanaşmırlar.
Məqalə müəllifi ilə əlaqə ünvanı: [email protected]
