Azərbaycan, Bakı, 19 avqust / Trend , müxbir E.Babayev/ Hakim Yeni Azərbaycan Partiyası (YAP) hesab edir ki, qarşıdan gələn prezident seçkilərində iştirak edən partiyalar müxalifətin aparıcı qüvvələridir. "Hesab edirik ki, seçkiyə qoşulan partiyalar müxalifətin daha aparıcı partiyalarıdır", çərşənbə axşamı Trend -a YAP icra katibinin müavini, millət vəkili Mübariz Qurbanlı bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Böyük Quruluş, Azadlıq, Milli İstiqlal, Sosial Demokrat partiyaları, o cümlədən "Azərbaycan Naminə" İctimai Forumun rəhbəri Eldar Namazov isə seçkidə iştirakdan imtina ediblər.
İndiyə qədər seçkiyə qoşulan 14 iddiaçıdan 6-sı siyasi partiyaların təmsilçiləridir. Bunlar hakim Yeni Azərbaycan Partiyasının namizədi İlham Əliyev, Ümid Partiyasının sədri İqbal Ağazadə, Müasir Müsavat Partiyasının sədri Hafiz Hacıyev, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Liberal-Demokrat Partiyasının sədri Fuad Əliyev və Yaşıllar Partiyasının sədri Mais Güləliyevdir.
Qurbanlı bildirib ki, müxalifət partiyalarının seçkidə iştirak etməyən hissəsinin aparıcı parttiyalar kimi qələmə verilməsi doğru deyil. "Bir sıra partiyaların seçkidə iştirak etməməsi ümumilikdə seçki prosesi ilə bağlı heç bir mənfi rəy yarada bilməz və hansısa partiyanın seçkiyə gedib-getməməsinin seçkinin gedişinə heç bir təsiri yoxdur. Dünyanın hər bir yerində seçki kampaniyası keçiriləndə iddiaçılar, namizədlər ortada olur. Onların kimliyi məsələsi yox, iddaçıların, namizədlərin olması və seçkinin qanun çərçivəsində keçirilməsi əsas meyardır. Bu meyar da tamamilə özünü doğruldur", - deyən Qurbanlı əlavə edib ki, seçkidə iştirak etməyən partiyaların bundan sonrakı davranışları seçkilərin nəticələrinə də təsirsiz ötüşəcək. "Müxalifətin bu və ya digər partiyalarının hərəkətləri seçkilərin nəticələrinə təsir göstərə bilməz. Seçkilərə əsas təsir göstərən amil seçicilərin və xalqın əhval-ruhiyyəsidir. Ayrı-ayrı partiyaların birləşməsi və ya ayrılması onların daxili işləridir", - deyə o əlavə edib.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
