Azərbaycan, Bakı, 20 avqust / Trend müxbir C.Babayeva/ Uzun müddət aralarında qarşıdurma olmuş Azərbaycanın iki müxalifət partiyasının eyni əməkdaşlıq mərkəzində təmsil olunmaları reallığa çevrilməkdədir.
"Azərbaycan Xalq Cəbhəsi və Klassik Xalq Cəbhəsi partiyalarının müxalifətin yeni əməkdaşlıq mərkəzində təmsil olunmaları üçün heç bir problem mövcud deyil. Partiyalar arasında vaxtilə mövcud gərginliklər artıq tarixin arxivində qalıb", çərşənbə günü Trend -a Klassik Xalq Cəbhəsi Partiyası Ali Məclisinin sədri Zəlimxan Məmmədli bildirib.
Trend -un arayışı: Azərbaycanın üç müxalifət partiyasının (Azərbaycan Xalq Cəbhəsi Partiyası, Azərbaycan Liberal Partiyası və Vətəndaş və İnkişaf Partiyası) təmsil olunduğu "Azadlıq" bloku prezident seçkisini boykot etmiş müxalifət partiyaları ilə yeni əməkdaşlıq mərkəzinin yaradılması üçün danışıqlara başlayıb. Bu günə qədər Müsavat, "Azərbaycan Naminə" İctimai Forum, Klassik Xalq Cəbhəsi partiyası ilə danışıqlar aparılıb.
Klassik Xalq Cəbhəsi Partiyasının təsis qurultayına qədər partiya Azərbaycan Xalq Cəbhəsi Partiyası adına iddia edirdi və "Klassiklər" AXCP-si kimi tanınırdı. Azərbaycanın eks-prezidenti, AXCP-nin sədri Əbülfəz Elçibəyin müavini olmuş Mirmahmud Mirəlioğlu 2000-ci ildə partiyanın iki yerə parçalanmasından sonra "Klassiklər" qanadına sədrlik edib. 2006-cı ildə partiyanın adında dəyişiklik edilərək KXCP adlandırılıb.
Məmmədlinin sözlərinə görə, hazırda AXCP və KXCP arasında fikir ayrılıqları mövcud deyil. "Bundan sonra milli maraqlar naminə hər iki partiyanın əməkdaşlığı mütləq zəruridir", - deyə o bildirib.
KXCP-nin hər zaman demokratik düşərgənin bir yerdə olmasının tərəfdarı olduğunu bildirən Məmmədli prezident seçkisi ilə bağlı eyni mövqe nümayiş etdirmiş müxalifət partiyalarının əməkdaşlıq mərkəzinin yaradılmasını vacib hesab edir.
"Yaradılacaq yeni mərkəzin uzunmüddətli strateji əməkdaşlıq prinsipi üzərində qurulması gözlənilir. Mərkəzin prezident seçkisindən sonrakı dövrdə də fəaliyyətinin davam etdirilməsi müzakirə olunacaq", - deyə o bildirib.
Məqalə müəllifi ilə əlaqə ünvanı: [email protected]
