...

Azərbaycanın aparıcı müxalifət partiyalarının fəalları prezidentliyə iddialı şəxsə dəstək verəcəklər

Siyasət Materials 28 Avqust 2008 12:32 (UTC +04:00)

Azərbaycan, Bakı, 28 avqust / Trend , müxbir E.Babayev/ Azərbaycanın aparıcı müxalifət partiyalarının fəalları prezidentliyə iddialı, müxalif Xalq Cəbhəsi Partiyası Ali Məclisinin keçmiş sədri Qulamhüseyn Əlibəyliyə dəstək verəcək. "Mən həmin şəxslərin adlarını çəkmək istəmirəm. Ancaq onlar mənim seçki fonduma müəyyən vəsait köçürəcəklər və seçkiyə hazırlıqla bağlı digər məsələlərdə mənə kömək edəcəklər", cümə axşamı Trend -a Əlibəyli özü məlumat verib.

Əlibəyli avqustun 8-də AXCP Ali Məclisinin sədri vəzifəsindən və partiya üzvlüyündən istefa verib. O, bundan sonra müstəqil şəkildə siyasi fəaliyyət göstərəcəyini bildirərək, prezidentliyə namizədliyini irəli sürüb. Mərkəzi Seçki Komissiyası (MSK) Əlibəylinin prezidentliyə namizədliyini təsdiqləyib.

Əlibəyli vurğulayıb ki, artıq müxalifət partiyalarının fəalları onun imzatoplama kampaniyasına yardım göstərirlər. "Namizədliyimin qeydə alınması üçün tələb olunan 40 min seçici imzasının təqribən 20 mini toplanıb. İndiyə qədər cəmi 2 rayonda Masallı və Gədəbəydə kiçik insident olub. Yəni polis bu işə müdaxilə etmək istəyib və bu məsələ dərhal həll olunub", - deyə o əlavə edib. Əlibəyli bu ayın sonuna imzatoplama kampaniyasını başa vuracağını bildirib. Əlibəyli seçki bloku yaratmaq fikrində olmadığını da əlavə edib.

Azərbaycanda prezident seçkiləri oktyabrın 15-də keçiriləcək.

Əlibəyli 1992-1993-cü ildə prezident Əbülfəz Elçibəyin müşaviri və parlamentdə rəsmi nümayəndəsi olub. 1995-ci ildən 2005-ci ilədək iki dəfə dalbadal Milli Məclisin deputatı seçilib. Avropa Şurası Parlament Assambleyasında Azərbaycan nümayəndə heyətinin üzvü olub. O, 1989-cu ildən AXCP-nin üzvü, 1993-cü ildən AXCP-nin Ali Məclisinin sədri idi.

Məqalə müəllifi ilə əlaqə ünvanı: [email protected]

Xəbər lenti

Xəbər lenti