Azərbaycan, Bakı, 29 avqust / Trend , müxbir E.Babayev/ Azərbaycan prezidentliyinə iddialı, müxalif Böyük Quruluş Partiyasının (BQP) sədri, millət vəkili Fazil Qəzənfəroğlu hakimiyyətin onun imzatoplama kampaniyasına yardım göstərməsi barədə iddiaları qəbul etmir. "Hakimiyyət bizim imzatoplama kmpaniyamıza niyə yardım etməlidir? Sadəcə olaraq, bəzi seçkidə iştirak etməyən müxalifət partiyaları bizim gücümüzü yaxşı bilirlər və bu səbəbdən belə məsələlərdə adımızı hallandırmaq, bizim işimizə kölgə salmağa cəhd etmək məcburiyyətində qalırlar" ",- cümə günü Trend -a Qəzənfəroğlu bildirib.
Trend -un arayışı: Azərbaycanda prezident seçkisi oktyabrın 15- də keçiriləcək. İndiyədək MSK prezidentliyə 18 iddialının namizədliyini təsdiqləyib. Onlardan yalnız hakim Yeni Azərbaycan Partiyasının prezidentliyə namizədi, indiki dövlət başçısı İlham Əliyevin namizədliyinin qeydiyyatı üçün tələb olunan ən azı 40 min imza toplanaraq, MSK-ya təhvil verilib və MSK Əliyevin namizədliyini qeydə alıb. Digər namizədlər imzatoplama kampaniyasını davam etdirirlər.
Bir sıra müxalif mətbu orqanlar namizədlərin imzatoplama kampaniyasına hakimiyyət tərəfindən kömək edildiyi iddia olunur.
Qəzənfəroğlu deyib ki, əksinə, hakimiyyət qurumları bir sıra hallarda imzatoplama kampaniyasına maneçilik törədirlər. "Biz imzaların toplanılmasını öz gücümüz hesabına həyata keçiririk. Ümumiyyətlə, biz prosesi tam şəffaf şəkildə həyata keçiririk. Bu işə qiyməti sonda MSK verəcək" - deyən Qəzənfəroğlunun sözlərinə görə, hələlik namizədliyinin qeydə alınması üçün 38 min imza toplanıb. "Əlavə olaraq, 6-7 min imza toplamağı planlaşdırırıq. Gələn həftə kampaniyanı başa vurub imzaları MSK-ya təqdim edəcəyik" - deyə o əlavə edib.
Müxalifətyönlü BQP 2004 - cü ildə yaradılıb, 2005- ci ildə dövlət qeydiyyatına alınıb. Partiyanın sədri Fazil Qəzənfəroğlu Milli Məclisin deputatıdır.
Məqalə müəllifi ilə əlaqə ünvanı: [email protected]
