Azərbaycan, Bakı, 18 sentyabr / Trend , müxbir C.Babayeva/ Azərbaycanda prezident seçkisinin boykotu ilə bağlı birgə bəyanat imzalamış bəzi müxalifət partiyaları Avropa Şurası Parlament Assambleyasının (AŞPA) müşahidə missiyasının rəhbəri Andres Herkelin boykotun səhv qərar olması ilə bağlı səsləndirdiyi fikirlərə razı deyillər.
Azərbaycanın müxalif "Azadlıq" blokunun həmsədri, Vətəndaş və İnkişaf Partiyasının sədri Əli Əliyev AŞPA - nın müşahidə missiyasının rəhbəri Herkeli fikirlərində real vəziyyəti ifadə etməyə çağırıb.
"Azərbaycan hökumətinin qarşısında öhdəliklər götürdüyü beynəlxalq təşkilatların çox böyük məsuliyyəti var və bəlkə də Avropa Şurası həmin təşkilatların sırasında birincidir. Həmin təşkilat öz simasını saxlamaq üçün, təbii ki, bu cür bəyanatlar verib, özünü sığortalamalıdır. Yaxşı olardı ki, Avropa Şurasının numayəndə heyəti Azərbaycandakı real vəziyyətə qiymət versin", - deyə Əliyev cümə axşamı Trend -a AŞPA-nın müşahidə missiyasının rəhbəri Andres Herkelin boykot qərarı ilə bağlı fikirlərini şərh edərkən bildirib.
Trend - un arayışı: AŞPA-nın müşahidə missiyasının rəhbəri Andres Herkel cümə axşamı Bakıda keçirdiyi mətbuat konfransında Azərbaycanın bəzi müxalifət partiyalarının prezident seçkilərini boykot etməsini prosesin ən uğursuz cəhəti adlandırıb.
Azərbaycanda prezident seçkisi oktyabrın 15 - də keçiriləcək. Sentyabrın əvvəlində "Azadlıq" blokuna daxil olan partiyalar - Xalq Cəbhəsi, Liberal Partiya, Vətəndaş və İnkişaf Partiyası və Müsavat Partiyası və "Azərbaycan Naminə" İctimai Forum oktyabrın 15 - də keçiriləcək prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
"Azərbaycan Naminə" İctimai Forumun rəhbəri Eldar Namazov isə, Trend -a Azərbaycanın müxalifət liderlərinin prezident seçkilərini boykot etməsi barədə qərarın yaranmış vəziyyətə tam adekvat olduğunu bildirib.
"Boykot əbədi mübarizə metodu deyil. Qarşıdan gələn prezident seçkisi ilə bağlı bu qərarın verilməsi müxalifətin aparıcı qüvvələrinin gələcək seçkilərdə iştirak etməyəcəyi demək deyil", - deyə Namazov bildirib.
Məqalə müəllifi ilə əlaqə ünvanı: [email protected]
