Azərbaycan, Bakı, 16 oktyabr/ Trend , müxbir N.Abdullayeva/Azərbaycanda prezident seçkisi demokratik və ədalətli keçib və Azərbaycanın tarixində ən demokratik hesab edilir, - cümə axşamı jurnalistlərə Azərbaycan prezidenti İcra Aparatının ictimai-siyasi şöbəsinin müdiri Əli Həsənov deyib.
Bunu beynəlxalq müşahidəçilərin əksəriyyəti təsdiq edir, - şöbə müdiri bildirib. "Seçicilərin çoxu İlham Əliyevə səs verib, bizim üçün əsas Azərbaycan xalqının etimadıdır", - Həsənov bildirib
Ilkin nəticələrinə əsasən, İlham Əliyev seçicilərin 89,04 faiz səsini toplayıb. Bu barədə çərşənbə günü Azərbaycan Mərkəzi Seçki Komissiyası elan edib.
Oktyabrın 15-də Azərbaycanda prezident seçkisi keçirilib.
Dövlət rəhbəri vəzifəsinə yeddi namizəd irəli sürülüb - Yeni Azərbaycan Partiyasının (YAP) sədri, indiki dövlət rəhbəri İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli.
MSK- nın ilkin nəticələrinə əsasən, İqbal Ağazadə 2,78 faiz, Fazil Qəzənfəroğlu 2,40 %, Qüdrət Həsənquliyev 2,22 faiz, Qulamhüseyn Əlibəyli 2,18 faiz, Fuad Əliyev 0,75 faiz, Hafiz Haçıyev 0,62 faiz səs toplayıb.
Azərbaycanın Mərkəzi Seçki Komissiyası tərəfindən 4 milyon 866 582 seçici qeydə alınıb. Prezident seçkisi ilə əlaqədar olaraq, 5359 seçki məntəqəsi açılıb. Onların 5148 - i daimi, 33 - ü Azərbaycanın xaricdəki səfirlik, konsulluq və daimi nümayəndəliklərindədir.
Azərbaycanda seçkini dünyanın 60 - a yaxın ölkəsindən 1233 nəfər beynəlxalq müşahidə edib. Mərkəzi Seçki Komissiyası tərəfindən ən böyük missiyalar Avropa Şurası, ATƏT, MDB - dən qeydə alınıb.