Azərbaycan, Bakı, 04 noyabr / Trend , müxbir S.Kazımlı / Bakı sakini 43 yaşlı qadını işə duzəltmək adı ilə ondan xeyli miqdarda pul alaraq mənimsəyib.
"Dələduzluq etməkdə təqsirləndirilən şəxs hazırda polislər tərəfindən axtarılır", - Səbail rayon Polis İdarəsindən (RPİ) çərşənbə axşamı Trend -a məlumat verilib.
RP İ-dən bildiriblər ki, Bakı sakini Elmira Cavid qızı Axundova polisə müraciət edərək, bu ilin avqust ayında Bakı sakini 64 yaşlı Məmməd Oruc oğlu Məmmədovun Sənaye Pedeqoji Texnikumuna müəllim düzəltmək adı ilə ondan 4500 manat pulunu alaraq mənimsədiyini söyləyib.
RPİ-dən əlavə ediblər ki, hazırda polis əməkdaşları Məmmədovu hadisə ilə bağlı dindirilməsi üçün axtarırlar.
PRİ-dən onu da qeyd ediblər ki, Məmmədov əvvələr dələduzluq etdiyi üçün bir neçə dəfə məhkum edilib.
Faktla bağlı Səbail RPİ-də Azərbaycan Cinayət Məcəlləsinin xeyli miqdarda ziyan vurmaqla dələduzluq törədilməsi (178.2.4-cü) maddəsi ilə cinayət işi başlanılıb, istintaq aparılır.
Azərbaycan Cinayət Məcəlləsinə görə, qeyd olunan maddə ilə təqsirləndirilən şəxsin təqsiri istintaqda və ya məhkəmədə sübuta yetirilərsə, həmin şəxs şərti maliyyə vahidi məbləğinin üç min mislindən beş min mislinədək miqdarda cərimə və ya əmlakı müsadirə olunmaqla və ya olunmamaqla üç ildən yeddi ilədək müddətə azadlıqdan məhrum etmə ilə cəzalandırılır.
Məqalə müəllifi ilə əlaqə ünvanı:[email protected]
