Azərbaycan, Bakı, 05 noyabr/ Trend , müxbir A.Hüseynbala / Azərbaycanda prezident seçkisində namizədləri ilə iştirak edən müxalifət partiyalarının birlik yaratması baş tutmayacaq.
"Bütöv Azərbaycan Xalq Cəbhəsi Partiyasınn sədri Qüdrət Həsənquliyev ümumi söhbətimiz zamanı birlik yaratmaq təklifini irəli sürüb. Mən bu birliyin yalnız seçki ərəfəsində yaradılmasının mümkün olduğunu bildirmişəm", çərşənbə günü Trend -a prezident seçkisində öz namizədi ilə iştirak edən Böyük Quruluş Partiyasının başqanı Fazil Qəzənfəroğlu deyib.
Trend - un arayışı: Oktyabrın 15 -də Azərbaycanda prezident seçkisi keçirilib.
Prezident seçkisində yeddi namizəd - Yeni Azərbaycan Partiyasının (YAP) sədri, indiki dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edib.
Seçkilərin nəticələrinə əsasən, İlham Əliyev hamıdan çox səs toplayıb -- 88.73 faiz. İqbal Ağazadə 2, 86 faiz, Fazil Qəzənfəroğlu 2,4 faiz, Qüdrət Həsənquliyev 2,28 faiz, Qulamhüseyn Əlibəyli 2,23 faiz, Fuad Əliyev 0,78 faiz, Hafiz Haçıyev 0,65 faiz səs yığıb.
Seçkidən sonra Həsənquliyev seçkidə iştirak edən müxalifət partiyalarının birliyinin yaradılması təklifi ilə çıxış edib.
Qəzənfəroğlunun fikrincə, Azərbaycanda indi heç bir seçki keçirilmədiyi üçün, hansı prinsip əsasında əməkdaşlıq edəcəklərini müəyyənləşdirmək çətindir: "Qüdrət Həsənquliyevin təklifinin reallaşmasının vaxtı çatmayıb. Ona görə, partiyaların digər məsələlərlə bağlı indi ayrı -ayrılıqda fəaliyyət göstərməsi daha önəmlidir", - BQP başqanı vurğulayıb.
Onun sözlərinə görə, prezident seçkilərində öz namizədləri ilə iştirak edən bir neçə partiyanın gələcək birgə əməkdaşlığı istisna olunmur.
Müxalifətyönlü Böyük Quruluş Partiyası 2004 - cü ildə yaradılıb, 2005 - ci ildə dövlət qeydiyyatına alınıb. Partiyanın sədri Fazil Qəzənfəroğlu Milli Məclisin deputatıdır.
Məqalə müəllifi ilə əlaqə ünvanı: [email protected]
