Azərbaycan, Bakı, 17 noyabr / Trend , müxbir C.Babayeva/ Azərbaycanın solçu partiyalarının birliyinin genişlənməsi gözlənilir.
"Bir sıra partiyalar birliyə qoşulmağa meyllidirlər. Həmin partiyaların müraciətləri birlikdə təmsil olunan partiya sədrlərinin növbəti görüşündə müzakirə olunacaq. Müzakirələrdən sonra birlikdə yekun olaraq neçə partiyanın təmsil olunacağı məlum olacaq", - deyə bazar ertəsi Trend a birliyin təsisçilərindən biri Marksizm - Leninizm platformasında Azərbaycan Kommunist Partiyasının sədri Telman Nurullayev məlumat verib.
Trend -un arayışı: Azərbaycan Sosialist, Kommunist, Vahid Kommunist partiyaları və Marksizm-Leninizm platformasında Azərbaycan Kommunist Partiyasının sədrləri solçu qüvvələrin birliyinin yaradılması ilə bağlı noyabrın əvvələrindən danışıqlar aparırlar. Birliyin yaradılmasında məqsəd bələdiyyə və parlament seçkilərində vahid platformadan çıxış etməkdir.
Azərbaycanda bələdiyyə seçkisi gələn il, parlament seçkisi isə 2010-cu ildə keçiriləcək.
Nurullayevin sözlərinə görə, birliyin təsiçilərinin bazar günü keçirilən görüşündə dekabrın sonuna qədər bəyannamə və fəaliyyət planının qəbul olunması barədə qərar qəbul olunub. "Birliyin adı ilə bağlı məsələ növbəti görüşdə öz həllini tapacaq", - deyə o bildirib.
Partiya sədri birliyin təsisiçiləri arasında müzakirə olunan məsələr arasında fikir ayrılıqlarının olmadığını bildirib. "Birliyin yaradılması ilə bağlı partiyaların strateji xətti eynidir. Azərbaycanda solçu partiyaların birliyinin olması zəruridir", - deyə Nurullayev bildirib.
Məqalə müəllifi ilə əlaqə saxlamaq üçün ünvan: [email protected]
