Azərbaycan, Bakı, 18 noyabr / Trend , müxbir İ.Əlizadə/ Azərbaycanı Türkdilli Ölkələrin Parlament Assambleyasında təmsil edəcək nümayəndə heyətinin tərkibi müəyyənləşib.
"Azərbaycanın Türkdilli Ölkələrin Parlament Assambleyasındakı nümayəndə heyətinə parlamentin sədri Oqtay Əsədov rəhbərlik edəcək", - bu barədə çərşənbə axşamı Trend -a Azərbaycanın Türkdilli Ölkələrin Parlament Assambleyasının yaradılması üzrə İşçi Qrupdakı nümayəndəsi, parlament katibliyinin rəhbəri Səyyad Ələsgərov bildirib.
Trend -un arayışı: Fevralın 20-21-də Antalyada Türkdilli Dövlətlərin Parlamentlərarası Şurasının ilk toplantısı keçirilib. Toplantıda Türkdilli Ölkələrin Parlament Assambleyasının yaradılması ilə bağlı niyyət protokolu imzalanıb. Türkmənistan və Özbəkistan nümayəndələri toplantıda iştirak etməyiblər.
Noyabrın 20-21-də İstanbulda türkdilli ölkələrin parlament sədrlərinin görüşü keçiriləcək. Görüşdə Parlament Assambleyasının yaradılması məsələsi müzakirə olunacaq və saziş imzalanacaq. Azərbaycan parlamentinin sədri Əsədovun başçılıq etdiyi nümayəndə heyəti toplantıda iştirak edəcək.
Ələsgərovun sözlərinə görə, nümayəndə heyətinə parlamentin İnsan hüquqları daimi komissiyasının sədri Rəbiyyət Aslanova, Hüquq siyasəti və dövlət quruculuğu məsələləri daimi komissiyasının sədri Əli Hüseynov, Mədəniyyət məsələləri daimi komissiyasının sədri Nizami Cəfərov, deputatlar Rafael Cəbrayılov, Fərhad Qəribov və Rövşən Rzayev daxildir.
O vurğulayıb ki, Assambleyadakı nümayəndə heyətlərinə türkdili ölkələrin parlament sədrləri rəhbərlik edəcək.
"Yeni yaradılan Parlament Assambleyasında hər ölkədən yeddi nümayəndə təmsil olunacaq. Onlardan biri nümayəndə heyətinə rəhbərlik edəcək, altı nəfər isə deputat olacaq. Assambleyaya sədrlik əlifba sırası ilə ratasiya qaydasında həyata keçiriləcək. İlk sədr ölkə isə Türkiyə olacaq", - deyə Ələsgərov əlavə edib.
Katibliyin rəhbəri bildirib ki, Parlament Assambleyasının iclaslarının ildə iki dəfədən az olmayaraq keçirilməsi və hər iclasda yeni sədrin seçilməsi nəzərdə tutulub. İclaslar sədrliyi həyata keçirən ölkələrdə baş tutacaq.
"Yeni qurumda qərarlar konsensus yolu ilə yekdilliklə qəbul olunacaq. Hər hansı ölkə müzakirə olunan məsələnin əleyhinə olarsa, bu məsələ ilə bağlı qərar qəbul olunmayacaq", - Ələsgərov deyib.
Onun sözlərinə görə, ilkin olaraq qurumun katibliyinin Türkiyədə yerləşməsi razılaşdırılıb. Lakin rəsmi Ankara buna tam razılıq verməyib. Ələsgərov vurğulayıb ki, Türkiyə katibliyin saxlanılması üçün maliyyə tələb edir.
"Katiblikdə çox sayda işçi çalışmayacağına görə, böyük vəsait tələb olunmur. Azərbaycan Assambleyanın katibliyinin Türkiyədə yerləşməsində təkid edir, digər ölkələr də buna tərəfdardır", - Ələsgərov bildirib.
Ələsgərov deyib ki, Türkmənistan və Özbəkistan Türkdilli Ölkələrin Parlament Assambleyasının yaradılması üçün İstanbulda keçiriləcək görüşdə iştirak etmək haqda qərar qəbul etməyiblər və bu ölkələrin toplantıya qatılması sual altındadır.
Məqalə müəllifi ilə əlaqə ünvanı: [email protected]
