Azərbaycan, Bakı, 26 noyabr/ Trend , müxbir N.Abdullayeva/ Avropa ölkələrinin mədəniyyət nazirlərinin Bakı konfransı dialoq nəzəriyyəsindən dialoq təcrübəsinə keçməyə imkan verəcək.
"Dekabrın 2-3-də Bakıda
keçiriləcək "Mədəniyyətlərarası
dialoq Avropa və qonşu regionlarda dinc yaşayış
və davamlı inkişafın əsası kimi" mövzusunda
konfrans Avropa Şurasının (AŞ) cari ilin mayında
işıq üzü görmüş Ağ kitabının davamıdır",
- AŞ-ın Azərbaycandakı ofisindən
çərşənbə günü Trend -a
bildiriblər.
Mədəniyyətlərarası dialoq dövlət və
hökumət başçılarının 2005-ci ildə
keçirilmiş Varşava görüşünün
prioritetlərindən biridir.
"Azərbaycan tərəfinin dəvəti ilə konfransda Avropa Mədəniyyət Konvensiyasını imzalamış 49 dövlətin nümayəndəsi, həmçinin Təhsil, Elm və Mədəniyyət Məsələləri üzrə Ərəb Təşkilatına (ALESCO) və Təhsil, Elm və Mədəniyyət üzrə İslam Təşkilatına (İSESCO) üzv bəzi dövlətlərin nazirləri iştirak edəcəklər", - AŞ-ın Azərbaycandakı ofisindən xəbər veriblər.
Konfransda aşağıdakı mövzular müzakirə ediləcək: "Avropa Şurasının mədəniyyətlərarası dialoq üzrə Ağ kitabı - universal dəyərlərdən yerlərdə fəaliyyətə doğru"; Mədəni siyasət (proqram və təşəbbüslər) və mədəniyyətlərarası dialoq: mədəniyyətlərin müxtəlifliyinin idarə edilməsində yeni konseptlər"; "İrs və mədəni dialoq - milli irsdən dünya irsinə doğru ". Konfransın yekunları üzrə Bakı bəyannaməsinin imzalanması gözlənilir.
Müəlliflə əlaqə saxlamaq üçün elektron ünvan: [email protected]