Azərbaycan, Bakı, 03 dekabr/ Trend , müxbir A.Hüseynbala/ Azərbaycanın müxalif partiyası bələdiyyə seçkilərində namizədlikləri irəli sürüləcək partiya üzvlərini müəyyənləşdirməyə başlayıb.
"Biz hər bələdiyyə üzvlüyünə bir - iki namizəd irəli sürəcəyik. Artıq 63 namizədimiz bəllidir. İnanıram ki, partiyamızın nümayəndələrinin çoxu növbəti seçkidə qalib gələcək", - çərşənbə günü Trend -a Müasir Müsavat Partiyasının (MMP) sədri, prezidentliyə keçmiş namizəd Hafiz Hacıyev bildirib.
Trend - un arayışı: Azərbaycanda bələdiyyə seçkiləri 2009 - cu ilin dekabr ayında keçiriləcək. Bundan əvvəl iki dəfə - 1999- cu və 2004 - cü illərdə bələdiyyə seçkiləri keçirilib.
Onun sözlərinə görə, rəhbərlik etdiyi partiya bələdiyyə seçkisində heç bir siyasi qüvvə ilə birgə iştirak etmək niyyətində deyil. "Bizim siyasi birliklərə qoşulmamaq haqda qərarımız var. Ona görə ki, Azərbaycanda dövlət qeydiyyatından keçmiş 50 - dən çox partiyanın əksəriyyətinin liderindən başqa heç bir üzvü yoxdur", - Hacıyev qeyd edib.
MMP sədri deyib ki, gələcək nailiyyətlərini gücü olmayan hər hansı partiya ilə bölüşmək niyyətində deyillər.
Hafiz Hacıyev 1992-1993 - cü illərdə "Azərbalıq" Dövlət Konserninin sədri olub. Əvvəl Azərbaycan Xalq Cəbhəsində, Müsavat Partiyasında təmsil olunub. 2000 - ci ildə Müasir Müsavat Partiyasını təsis edib, partiya 2002-ci ildə dövlət qeydiyyatından keçib.
Müasir Müsavat Partiyası özünü iqtidara qarşı konstruktiv müxalifət hesab edir.
Məqalə müəllifi ilə əlaqə ünvanı: [email protected]
