Azərbaycan, Bakı, 04 dekabr/ Trend müxbir A.Hüseynbala/Azərbaycanın müxalif partiyalarının təmsil olunduğu Müxalifətin Əməkdaşlıq Mərkəzinin Bakı Şəhər İcra Hakimiyyətinə qarşı iddiası təmin olunmayıb.
"Dekabrın 3 - də keçirilən məhkəmə iclasında iddiaçı tərəfin nümayəndələrinin prosesə Bakı Şəhər İcra Hakimiyyətinin və Bakı Şəhər Baş Polis İdarəsi rəhbərlərinin dəvət olunması barədə vəsatəti rədd edilmişdi. Bu gün isə
Səbayel Rayon Məhkəməsinin hakimi Elnur Həsənov iddiamızın təmin olunmaması barədə qərar çıxardı", - cümə axşamı Trend - a Müxalifətin Əməkdaşlıq Mərkəzinə (MƏM) daxil olan Vətəndaş və İnkişaf Partiyası (VİP) sədrinin müavini Büllur Hümbətov bildirib.
Trend - un arayışı: MƏM oktyabrın 15 - də keçirilmiş prezident seçkisi ərəfəsində Bakının 9 meydanından birində kütləvi aksiya keçirmək üçün bir neçə dəfə Bakı Şəhər İcra Hakimiyyətinə müraciət edib. Meriya aksiyaların MƏM -in müraciətində göstərilən yerlərdə keçirilməsinə razılaşmayıb və Azərbaycan Dövlət Neft Şirkətinin Bibiheybətdəki İdman-Sağlamlıq Mərkəzini ayırıb. Müxalifət həmin yerə getməyərək, aksiyaları təxirə salıb.
Hümbətov deyib ki, MƏM məhkəmənin qərarından apellyasiya şikayəti verəcək.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Məqalə müəllifi ilə əlaqə ünvanı: [email protected]