Azərbaycan, Bakı, 12 yanvar / Trend , müxbir A.Hüseynbala/ Azərbaycanın müxalif Müsavat Partiyasının referendumla bağlı yaratdığı təşəbbüs qrupunda siyasi qüvvələrin hamısı təmsil olunmayacaq.
"Biz yalnız müxalifətin yaradacağı vahid təşəbbüs qrupunda öz nümayəndələrimizin iştirakına qərar vermişik", - bazar ertəsi Trend -a "Azərbaycan Naminə" İctimai Forumun (ANİF) rəhbəri Eldar Namazov bildirib.
Trend -un arayışı: Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" təşəbbüs qrupları yaradıblar. Mərkəzi Seçki Komissiyası YAP-ın təşəbbüs qrupunun qeydə alınması üçün bildiriş verib.
Bundan əlavə "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Respublika və Qarabağ Uğrunda Vətəndaş Hərəkatı" təşəbbüs qrupunun yaradılması barədə qərar verib.
Yanvarın 10-da 21 media rəhbəri tərəfindən referendumu dəstəkləmək məqsədilə "Azad söz" Təşəbbüs Qrupu təsis edilib.
Həmin gün həmçinin Azərbaycan Həmkarlar İttifaqları Konfederasiyası (AHİK) və bir sıra QHT-lər Konstitusiyaya əlavə və dəyişikliklərə dair referendumla bağlı İctimai Təşkilatların Təşəbbüs Qrupunu təsis ediblər.
ANİF rəhbəri Müsavat Partiyasının yaratdığı təşəbbüs qrupunun referendumla bağlı müxalifətin vahid möqedən çıxış etməsinə nə qədər problem yaradacağı məsələsini isə şərh etmək istəməyib.
"Azərbaycan Demokrat Partiyasına Müsavatın yaratdığı təşəbbüs qrupuna öz nümayəndələri ilə qoşulmaq haqda təklif daxil olmayıb", - bazar ertəsi Trend -a adıçəkilən müxalif patiyanın sədri Sərdar Cəlaloğlu bildirib.
Cəlaloğlu deyib ki, bu cür təklif olunsa belə, onlar yalnız müxalifətin yaradacağı vahid təşəbbüs qrupunda iştirak etmək niyyətindədirlər.
"Azərbaycan Xalq Cəbhəsi Partiyası bizim yaratdığımız təşəbbüs qrupunda öz nümayəndələri ilə təmsil olunmaq təklifi irəli sürüb və bununla bağlı razılıq əldə edilib", - bazar ertəsi Trend -a Müsavat Partiyası Mərkəzi İcra Aparatının rəhbəri Arif Hacılı bildirib.
Onun sözlərinə görə, Klassik Xalq Cəbhəsi Partiyası ilə bu istiqamətdə müzakirə aparılır. "Bu suallara yaxın günlərdə tam cavab tapılacaq", - Hacılı vurğulayıb.
"Müsavatın ayrıca yaratdığı təşəbbüs qrupunu biz dəstəkləyirik. Artıq demək olar ki, həm "Respublikaçılar" və "Respublika və Qarabağ Uğrunda Vətəndaş Hərəkatı" təşəbbüs qrupları birgə fəaliyyət göstərir", - bazar ertəsi Trend -a Azərbaycan Xalq Cəbhəsi Partiysının (AXCP) sədr müavini Həsən Kərimov deyib.
Onun məlumatına görə, "Azadlıq" blokuna daxil olan digər partiyalar da "Respublikaçılar" təşəbbüs qrupunun fəaliyyətinə dəstək vermək niyyətindədirlər.
Məqalə müəllifi ilə əlaqə ünvanı: [email protected]